«Сені қайтіп көре аламын ба, туған жерім...»

– Қазақстан Республикасы Тәуел­сіздігінің 30 жылдығын ме­ре­келеу аясында Елбасы кітап­ха­насында Юрий Гагариннің ғарышқа ұшуының 60 жылдығы және Тоқтар Әубәкіровтің ғарыштағы алғашқы сапарына 30 жыл толуына арналған «Адамға табын, жер, енді!» халықаралық көрмесі ашылды. Көрме атауы Олжас Сүлейменовтің ға­рышты бағындырған адамзатты әй­гілеп, күллі әлемнен сүйінші сұра­ған поэмасынан алынып отыр. Ауқым­ды көрменің арқауына ай­налған атау да адамның қия­лына қанат бітіреді. Бүгінгі кез­десуіміздің құрметті қонағы – қазақтың тұңғыш ғарышкері Тоқтар Оңғарбайұлы Әубәкіров. Басқосудың да, көрменің де жаңа елордадағы Ел­басының алғашқы жұмыс резиденциясында өтуінің символдық мәні бар, өйткені оның салиқалы саясатының арқасында Байқоңыр бұрынғысынша өзінің стратегиялық маңызын сақтап қалды. Қазақстан өзінің ғарыш саласын қалыптастырып, батырларын аспан әлеміне аттан­дырды. Еліміздің әлемдік ға­рыш саласын дамытуға қос­қан үлесі туралы айта келе, Қазақстан Президенті Қасым-Жомарт Тоқаев: «Байқоңыр – күллі адамзаттың игілігі, оның әлемдік космонавтикадағы тарихи рөлі зор» деген болатын. Біздің көрме – соның жарқын дәлелі. Елбасы кітапханасы Цифр­лық даму, инновациялар және аэроғарыш өнеркәсібі министрлігі, Қызылорда, Ақ­төбе, Солтүстік Қазақстан об­лыстарының әкімдіктерімен және «Роскосмос» МК, Қазақ­стандағы Россотрудничество өкілдігі, Мәскеудегі Ю.А.Гагарин атындағы Космонавтика музейі мен Украинадағы С.П.Королев атындағы Ұлттық космонавтика музейі секілді шетелдік се­ріктестерімен бірге осы жобаны жүзеге асырды, – деді іс-шараны ашқан Елбасы кітапханасының директоры Бақытжан Темірболат.
Ол қатысушыларды көрме серік­тестері – Ю.А.Гагарин атын­­дағы Кос­мо­навтика музейі (Мәскеу қ.) және С.П.Королев атындағы Ұлттық космонав­тика музейі (Житомир қ.) өкіл­дерінің бейнеүндеулерін көруге шақырды.
– Ғарышты игеру басталғаннан бері 60 жыл өтті. Бұл – адамның өмірі үшін аз көрінгенімен, адамзат үшін ғарыш кеңістігін игерудің алғашқы қадамы. Бар­шаңызды осы мерейлі мезетпен құттықтаймын! Өткен ғасырдың басында Эдуард Кон­стантинович Циолковский айтқан армандарды жүзеге асы­рамыз деп ойлаймын. Біз, адамзат, басқа планеталарды бағын­дырамыз. Бұл сәт алыс емес. Ал осы кездесуде отырған жастар бұған куә болып қана қоймай, сонымен қатар қатысушы да болуы мүмкін, – деді өзінің құттықтау сөзінде Тоқтар Әубәкіров.
Іс-шараға қатысқан Нұр-Сұлтан қаласының №72 мек­теп-
лицейінің оқушылары мен Сервис және туризм колледжінің студенттері жиын ал­дында «Жер-Ана. Тұңғыштар то­ғысы!» көр­месінің материалдарымен, адам­заттың ғарыш кеңістігіндегі ал­ғашқы қадамдарының хроникасымен, ғарыш ғылымындағы жетістіктер және алғашқы ғарыш­керлер Т.Әубәкіров, Т.Мұсабаев және А.Айым­бетовтің ерлік­терімен танысты.
Онлайн байланысқа (ZOOM ар­қылы) Нұр-Сұлтан қаласындағы Бас­қару колледжінің, Құрылыс кол­леджінің, Менеджмент және бизнес, Көпбейінді колледждің сту­дент­тері, Қажымұқан атын­дағы маман­дан­дырылған олим­пиадалық резерв мек­тебінің оқу­шылары, сондай-ақ Қа­рағанды қаласындағы Лингва шет тілдері колледжінің білімгерлері, Маң­ғыстау облысы Бейнеу қаласы мектеп-гимназиясының, Ақтөбе облысы Қобда ауылдық мектеп-гимназиясының, Алматы және Тараз қалаларының Назарбаев зияткерлік мектептерінің оқу­шылары мен В.Пацаев атындағы Жас ұшқыштар мектебінің және «Т.Ж. Бигелдинов атындағы Әуе қорғаныс күштерінің Әс­кери институты» РММ-нің кур­сант­­тары шықты. Кездесуге қаты­сушылар Қазақстанның тұңғыш ғарышкеріне көкейдегі сұра­қ­тарын қойды.
«Бұрындары ғарышкерден мықты денсаулық талап етілетін. Бірақ бүгінде ғарышкер болу үшін ғылымға құштар болудың өзі жеткілікті. Адамның ғылыми білімі ғана оны ғарышқа алып шыға алады... Бала кезімнен ұш­қыш болуды армандайтынмын. Гагариннің ұшқан кезінде бәрі ғарышкер болғысы келді, ал мен ұшқыш болам деген ойымнан айныған жоқпын. 1989 жылы Нұрсұлтан Әбішұлы Назарбаевпен кездескен кезімде ол кісі маған ғарышқа ұшу керек екенін айтты, мен қазір мұны істей алмаймын деп жауап бердім. 1991 жылы тағы жолықтық. Сол кезде ол кісі мұның оған, маған емес, халық үшін қажет екенін айтты. Мен келісіп, ғарышқа ұшу­ға дайындала бастадым. Ға­рышқа сапарымды өз халқыма арнадым. Осы күнге дейін мені таңдаған еліме, Елбасымызға алғысымды айтамын. Тағдырыма ризамын! Ұшып бара жатып мен өз жерімізге қарадым да: «Енді сені қайтіп көре алам ба, туған Жерім, қасиетті Қазақстаным» дедім. Кез келген ғарышкер адам болғандықтан, қорқыныштың болуы да заңдылық. Кез келген ға­рышкердің қорқынышты жеңе ала­тын талпынысы бар» деді тұң­ғыш ғарышкер.