Екібастұздық жас талапкер Мәдина Түсіпова сурет әлемінің есігін ойда-жоқта осылай ашты. 9-сыныптан кейін колледжге түсіп, музыкалық дарынын одан әрі шыңдаймын деп жүрген шақта бойда жасырылған жаңа қабілеті буырқанып сыртқа шықты.
Май шамның жарығымен қаракөлеңкеде салған суреті әйгілі «Мадагаскар» мультфильміндегі төрт кейіпкер болатын. Тәп-тәуір шыққан секілді. Суретті көрген сайын «мынаны мен салдым ба?» деп таңданып қояды. Әке-шешесіне көрсетіп еді, олар да аң-таң. Мәдинаның мұндай қабілеті барын бұрын байқамапты. Тұңғыш баланың алдағы тағдыры да сол түні шешілді.
– Музыканың оқуын қоя тұр, – деді әкесі.
– Сенен жақсы дизайнер шығады! – деп көтермелеп қойды шешесі.
Ақыры Екібастұздың гуманитарлық-техникалық колледжін таңдады. Бұйыртса «Дизайн және сурет» мамандығын меңгеріп шықпақ. Алайда оқу оңайға соқпады. Біріншіден, оқу орысша екен. Қаладағы қыздар гимназиясында тәлім алған Мәдина, орысшаға жүйрік болса да, саладағы терминдерді түсініп, қабылдауға келгенде қатты қиналатын. Екіншіден, жаңадан түскен студенттердің барлығы дерлік оқушы кезінен қаладағы көркемсурет мектептеріне барып, тәлім алғандар. Ең нашары Мәдина болып шықты. Бұл сурет салудың қарапайым техникаларының өзін білмейді екен. Намысқа тырысып, тер төгуге тура келді.
– Ә дегенде белсенділік танытып, топтың «старостасы» атанған едім. Соным дұрыс болған екен. Өйткені біз оқитын бөлменің кілті үнемі менде жүреді. Сабақтан кейін қалып, шеберлігіңді шыңдайтын орын бар. Шық, кілтті тапсыр деп ешкім тықақтамайды. Сөйтіп түске дейін сабаққа қатысып, түстен кейін бірге оқитын студенттерден байқап қалған артықшылықтарды үйренуге тырыстым. Кеш түсе қайтатын күндерім көп еді. Дәл осы жағдай колледжді тәмамдағанша жалғасты, – дейді ол.
Колледжден кейін бірден Павлодар педагогикалық университетіне оқуға түсті. Биыл бітірмек. Енді ол көркемсурет пәнінің мұғалімі болмақ. Алдағы жоспарын да осы саламен байланыстырып отыр. Шәкірт тәрбиелеп, жеке орталығын ашқысы келеді.
Жалпы, Мәдинаның өнерін көптен бері бақылап жүрміз. Көпшілік оны «суретті теріс салатын қыз» деп те атайды. Бұл қабілетін отандық арналардың тікелей эфирінде көрермен қауымға талай мәрте көрсетті де.
– 2017 жылы «Екібастұз аруы» байқауында топ жардым. Бұған бұрын да екі мәрте қатысқан едім. Жолым болмады. Екі ретте де мәртебелі қазыларды музыкалық қабілетіммен таңғалдырғым келген. Алайда бұдан ештеңе шықпады. Оның үстіне қатысушылардың дені ән айту, аспапта ойнау, поэзия оқу секілді өнер түрлерін ұсынады екен. Ал мұнымен қазір ешкімді таңдандыра алмайсың. Үшінші мәрте қатысқанда ерекше бір дүние жасауды көздедім. Сөйтіп өз бетімше суретті теріс салу техникасын меңгердім. Бұл өнер шетелде жақсы дамыған. Біздің елге енді-енді келіп жатыр. Суретті теріс салу – шоудың бір түрі. Оны екі-үш минуттың ішінде салып үлгеруің керек. Сонда ол көпшілікті бірден баурап алады. Бұл жерде көп жаттығу талап етіледі. Қолдың еске сақтау қабілетін жаттықтыру керек, – дейді Мәдина.
Ол суретші ретінде байқау, фестивальдерге қатысуға аса құлық таныта бермейді. Дегенмен аз-кем жетістіктері де баршылық. Мәселен, 2018 жылы облыс көлемінде ұйымдастырылған «Егемен ел» байқауында топ жарған. 2019 жылы «Жастар жылы» аясында екібастұздықтарға жеке көрмесін ұсынды. Жұртшылық жылы қабылдады.
Мәдинаның осы күнге дейін акварель, гуаш, қарындашпен салған суреттерінің ұзын-саны 200-ден асады. Ал майлы бояумен салған суреттері бұдан әлдеқайда аз. Айтуынша, майлы бояумен бір суретті салуға кем дегенде жарты жыл уақыт кетеді екен. Мәдина барабанда, домбырада, гитара мен пианинода еркін ойнайды. Ән шырқайды. «Екібастұз аруы» деген атағы және бар. Облыстық «Павлодар аруы» байқауында да топ жарып, республикалық додаға жолдама алған. Қазір Екібастұз қалалық радиосында жаңалықтар жүргізеді. Бұйыртса, жаңа оқу жылынан бастап мектеп оқушыларына көркемсуреттің қыр-сырын үйретуді жоспарлап отыр.
– Әзірше менің меңгергенім – академиялық бағыт. Яғни суретті қолданыстағы ережелеріне, техникаларына бағына отырып саламын. Алдағы уақытта сурет әлеміндегі өз бағытымды тапқым келеді. Өзіме ғана тән ерекшеліктің болғанын қалаймын, – дейді жас суретші.
