Әлем • 10 Маусым, 2021

Джо Байден Еуропаға сапарлап барады

28 рет көрсетілді

АҚШ-тың президенті Джо Байден қызметіне кіріскелі алғаш рет Еуропаға ресми сапармен бар­мақ. Сапар барысында бірқатар еуро­палық серіктеспен және Ресей прези­денті Владимир Путинмен жүздесу жоспарланған.

Байден Washington Post басылымында жарық көрген сапарға қатысты мәлімдемесінде «Ертеңіміз белгісіз елең-алаң кезеңде өмір сүріп жатқанымыз белгілі. Бұл – ғасырда бір кездесетін пандемия кезеңі. Сапар АҚШ-тың жаңа жоспарын жүзеге асыруға, бұл жолда серіктестер, жақтастар­мен бірлесуге, демократияның күші жаңа ғасырдың тосын сын-қатерлерін еңсеруге жететінін көрсетуге мүмкіндік ашады», деді.

Президент, ең алдымен, Британияда өтетін G7 саммитіне қатысады. Одан кейін Брюссельге НАТО жиналысына қатысуға аттанады. Бельгия астанасында Еуропа одағының көшбасшыларымен келіссөздер жоспарланған. Бұл іс-шара барысында АҚШ пен Еуропа одағының сыртқы саясаты талқыланады.

Орталық және Шығыс Еуропа да АҚШ-пен байланысын нығайта түсуге мүдделі. Германия да АҚШ делегациясын өз жерінде қарсы алуға дайын.

Франция қауіпсіздік мәсе­лесіне келгенде АҚШ жақсы серіктес емес деген сенімінен алыстамақ рай таныт­пады. «Бесінші республика» үлкен стратегиялық жоспарда Еуропа одағы жеке-дара да жақсы нәтиже көрсете алады деген ойда.

Байден батысеуропалық әріптес­терімен алдағы апта ішінде келісіп үлгеруі қажет. Өйткені Женевада өтетін конференция кезінде Ресей прези­денті Владимир Путинмен келіссөз жос­парланған. Байден сонымен қатар Түркия президенті Режеп Тайып Ердоғанмен кездесу өткізуі керек. Бұл жиындардың талассыз өтпеуі мүмкін емес, дейді сарапшылар. Өйткені тараптар арасында тартысты мәселелер көп.

Негізі, бұл сапардан АҚШ жағы нақ­ты нәтижеге қарағанда келіссөз бен әріп­тес­тікке кірісуді күтіп отыр. Бай­ден бұл сапарында АҚШ-тың сыртқы сая­саты­ның бағыты өзгергенін, бұған де­йін­гі пре­зидент Дональд Трамп ту­ғыз­ған теріс көзқарасты өзгертуге тырыспақ.

 

Соңғы жаңалықтар

Алдағы үш тәулікте күн суытады

Ауа райы • Бүгін, 11:55

Ұқсас жаңалықтар