ПАРТИЯ БЕДЕЛІ – ІСКЕРЛІК ПЕН ІЗДЕНІСТЕ

“Нұр Отан” ХДП Маңғыстау облыстық ұйымының кезекті ХІ конференциясында облыс әкімі, партияның облыстық филиалының төрағасы Қырымбек Көшербаев “Облыстық ұйымның 2008-2009 жылдардағы жұмыс қорытындылары және алдағы міндеттер туралы” баяндама жасады. Облыс партия ұйымы ел дамуына ерекше серпін беріп, маңызды міндеттер жүктейтін Елбасымыз Нұрсұлтан Назарбаевтың “Жаңа онжылдық – жаңа эконо­микалық өрлеу – Қазақстанның жаңа мүмкіндіктері” атты Жолдауын іске асыруға халықтың барлық топтарын жұмылдыруға айрықша маңыз беруде.  Стратегияда көр­сетілген міндеттерге орай өңірлік іс-қимыл жоспарымызда белгіленген әрбір нысанның индустриялық-инновациялық, инвестициялық жобалардың іске асуына әрбір адамның белсенділігі мен күш-жі­герін жұмылдыру басты мақ­сатымыз, – дейді Қ.Көшербаев өз сөзінде. Шындығында да бұл күндері өз қатарына 25 мыңға жуық партия мүшелерін біріктіріп отырған 273 бастауыш партия ұйымы әлеуетті күшімізді абыройлы ортақ іске, өңірімізде ұйыған ынтымақ болып, татулық пен достықтың тамыры тереңдей, ел еңсесі көтеріле түсуі жолында жұмыс жасап келеді. Аймағымыздағы игілікті іс-шаралар­дың барлығына дерлік нұротандық­тар  белсене араласады. Бірқатар өзекті мәселелер олардың тікелей бастамасымен, қажетті жерінде табанды түрде талап етілуі нәтиже­сінде жүзеге асырылып жататын­дығы көңілге қуаныш ұялатады. Өткен жылы мәслихаттардағы “Нұр Отан” фракцияларымен, мәслихат депутаттарымен бірлесе отырып, бөлінген қаржылардың тиімді жұмсалуына, берілген тапсырма­лардың орындалуына партиялық бақылау жолға қойылыпты. Осы ретте аумақтық филиалдар­да 57 партиялық бақылау постылары құрылып, олардың бақылауында болған нысандардың 97 пайызын­дағы жұмыстар толықтай сапалы аяқталған. Сондай-ақ сыбайлас жемқорлыққа қарсы күресті тиімді, жүйелі жүргізу жолында қоғамдық ұйымдармен, бұқаралық ақпарат құралдарымен бірлесе жұмыс жүріп, мекеме, кәсіпорын кеңселерінде “сенім телефондары” орнатылыпты. Конференция делегаттары ұйым­ның саяси кеңесін құрып, облыстық филиалдың төрағалығына облыс әкімі Қ.Көшербаевты сайлады. Төр­ағаның бірінші орынбасарлығына Ж.Қараев тағайындалды. Жоламан БОШАЛАҚ, АҚТАУ.