Қазақстан • 27 Шілде, 2021

Жоғалып-табылғандардың әлегі жетерлік

47 рет көрсетілді

«Таксиші жоғалды» дегенге жұрт елең ете қалады. Өйткені осы кәсіптің адамдарына әне бір жылдары жиі қастандық жасалып, өлі денелері жиі табылатын. Бұл жолы да сондай оқиға емес пе екен деп петропавлдық тәртіп сақшылары өре түрегелген.

Оның үстіне, жергілікті такси паркінің 45 жастағы жүргізушісі бұрын жоғалып кету сияқты қылық көрсетпеген, салмақты адам екен. Әйелі үш күннен бері үйге келмеді деген соң полиция қала аумағын, оның ішінде саяжайларды секторларға бөліп, бірнеше топпен іздеуге кіріс­кен. Оған криминалдық полиция қызметкерлері, учаскелік полиция инспекторлары, патрульдік полицейлер, 40-тан астам ерікті, жоғалған азаматтың жақындары мен әріптестері тартылды.

БАҚ-қа, әлеуметтік желілерге іздеу жариялау жайлы хабарлар ор­на­ластырылды. Іздеудегі адам­ның суреті, айрықша белгілері көр­сетіліп, бүкіл қала жұртшылығы құлақ­тан­ды­рылды. Мұндайда түрлі болжам мен қауесет те өрттей лаулады. «Тағы да таксистерді өлтіретіндер шы­ғып­ты», деген үрей тұрғындарды алаң­датумен болды.

Көп өтпей, әлеуметтік желідегі хабар­ландыруды көрген адамдардың бірі оны дүкенде көргенін жазыпты. Жанында бір адам болған. Сол дүкенге асығып-үсігіп жеткен полиция іздеудегінің арақ сатып алып жатқанын, жанында оның жа­қындары танитын адамның бол­ғанын бейнекамерадағы жазбадан көреді. Ал ол кісінің саяжайы барын білген соң, полиция таксишінің жақындарымен бірге барса... жоғалған адам сонда «дем алып» жатыр екен. Өзінің бүкіл қаланы дүрбелеңге сал­ғанында да жұмысы жоқ, қызара бөртіп, шалжиған күйінде жатқан...

Әрине оның өз отбасына хабар бермей, із-түзсіз кеткенінде бір мән бар сияқты. Әйеліне ренжіп кетті ме, әлде тағы бір себебі болды ма? Ол жағы белгісіз. Полиция тауып бергеніне мәз, әйелі табылғанына мәз болып тарасқан.

Осы орайда бір айта кетерлігі, мұндай айдың-күннің аманында аяқастынан жоғалып-табылушыларға қатысты жауапкершілік жүктейтін норма қолданыстағы заңнамада мүл­де қарастырылмаған екен. Қанша жұртты әуре-сарсаңға салған, халық арасында шағын болса да дүрбелең тудырған адам сөйтіп еш жазасыз кетті. Жеке басы еркін болса да әр­бір адам өзінің қоғам алдындағы жауапкершілігін сезінуі керек қой. Қазіргідей байланыстың дамыған заманында қанша ашуланса да әйеліне: «Мен аманмын, іздеме» десе болушы еді. Бірақ ерегістің салдары болуы керек, ондайға таксиші «серінің» ақылы жетпеген болып шықты. Өкі­нішке қарай, мұндай жауапсыздар қоғамымызда аз еместігі анық.

Соңғы жаңалықтар

Әлемдік мұнай бағасы күрт өсті

Экономика • Бүгін, 12:37

Қазақстанда ұн қымбаттады

Экономика • Бүгін, 12:17

Бүгінгі валюта бағамы

Қаржы • Бүгін, 11:00

Ұқсас жаңалықтар