Сауалнама көрсеткендей, көп жағдайда азаматтардың 82,5 пайызы жедел жәрдем қызметіне 4,69 орташа баллмен қанағаттанған.
Азаматтардың «103» - ке шақыру жағдайларының 97,7 пайызы қабылданды, ал 2,3 пайыз азаматтарға өтініш беру үшін басқа нөмір берілген.
Жедел жәрдем көрсету ережесі бойынша диспетчерге қоңырау түскен сәттен бастап бригада шақыру орнына шұғылдығына байланысты 10-60 минут ішінде келуі тиіс. Респонденттердің 85,4 пайызы жедел жәрдемді күту мерзімдері белгіленген нормативтерге сәйкес келетінін көрсетті. Жағдайлардың 10,4 пайызында жедел жәрдемнің шақыруға келуі бір сағаттан астам уақытты құрады, тағы 4,2 пайыз қатысушылар жедел жәрдемнің нақты күту уақытын есіне түсіре алмады. Кейбір жағдайларда жедел жәрдем қызметін төрт сағат немесе тіпті бес күн күтуге тура келгені анықталды.
Респонденттердің 94,8 пайызы дәрігерлер пациенттерге қажетті көмек көрсеткенін айтты. Жағдайлардың 47,4 пайызында үйде көмек көрсетілді, 35,2 пайызында фельдшерлер науқастарды ауруханаға жеткізді. Қызмет алушылардың 1,9 пайызы жедел жәрдем бригадасы қажетті көмек көрсетпей кеткенін атап өтті.
Жалпы, жедел жәрдем қызметкерлерінің «сыпайылық және қажеттіліктерге назар аудару» санаты бойынша жұмысы азаматтарды 88,3 пайызға қанағаттандырды. Ең төмен баға Шығыс Қазақстан, Маңғыстау және Батыс Қазақстан облыстарындағы бригадаларға берілді.
