Аймақтар • 06 Тамыз, 2021

Күре жол еркелікті көтермейді

32 рет көрсетілді

Қарағанды облысында соңғы бір жарым жыл үшінде күре жолдың бойындағы апаттың салдарынан 200 адам көз жұмып, 800 жолаушы түрлі дене жарақаттарын алған екен. Өкініштісі сол, апатқа ұшыраған жерлестеріміздің басым көпшілігі – белсенді еңбекке қабілетті, яғни дер шағындағы азаматтар. Ал әрбір тоғызыншы апатта балалар зардап шеккен. Сірескен статистика осылай дейді...

Қарағанды облыстық проку­ра­турасы ұйымдастырған Құ­қық қорғау және арнайы органдар үйлестіру кеңесі­нің отырысында осындай жантүршігерлік деректер мәлім болды. Онлайн режімде өткен бұл жиынға мем­ле­кеттік органдардың, облыстық және аудандық әкімдіктердің, сонымен қатар авто жолдағы қызмет көрсетуші ұйымдардың өкілдері қатысып, өңірдегі жол қауіпсіздігі проблемалары бо­йынша пікір алмасуға атсалысты.

Жиында айтылғандай, жол үстіндегі апаттың басым көп­ші­лі­гі жол қозғалысы ере­же­лерін өрескел бұзудың салдарынан бо­лады екен. Әсіресе, «темір тұл­парды» тізгіндегендер жыл­дам­дықты шамадан тыс асырып жіберіп, өзін де, өзгені де бақытсыз жағдайға душар қылатыны өте көп тіркелген. Тіпті әрбір екі апаттың бірі осындай заң бұзушылықтың сал­да­рынан болатын көрінеді.

Бұдан бөлек, жол апатының көбеюіне сол жолдардың сапа­сыз­дығы да теріс әсерін тигізеді дегенді алға тартты мамандар. Ойқы-шойқы жолдармен келе жатқан көліктер көбіне тегіс жерді қуалаймын деп, қар­сы жолаққа шығып кететін жағ­дайлар жиі кездеседі екен. Одан кейін құқық бұзушыларды тәр­тіп сақшылары тарапынан дер кезінде жазаламау да жа­ман көрсеткіштің артуына өз «үлесін» қосып отыр. Мәсе­лен, жол полициясынан «әке-көке­леп» құтылып кеткен жүр­гі­зу­шілер жауапкершілікті лезде ұмытып, көп ұзамай ескі әдет­те­ріне басатыны белгілі.

Тағы бір айта кететін жайт – қа­зіргі автомектептердегі жүр­­гізушілерді оқыту мәселесі. Құ­қық қорғаушылар бұл сала­да­ғы оқыту үдерісінің сапасы кө­ңіл көншітпейді дейді. Ал прокурорлар осы істі қатаң қа­­дағалау керек деп санайды. Жалпы, мұндай сынның жаны бар. Бүгінде «бармақ бас­ты, көз қыстымен» жүргізуші куәлігін алатындардың көбейіп тұрғаны мәлім. Мұндай сорақылықтың өзі күре жолдың үстіндегі қауіп-қатер бұлтын қою­латып, қаншама апатқа әкеп соқ­тырып жатыр десеңізші?!

Жиында бейнекамера ор­на­тылмаған немесе жол бел­гі­лері жоқ елді мекендерде апат­­тың жиі болып тұратыны ай­тылды. Бұл да – ойланатын жайт. Жасыратыны жоқ, қазір ірі қалалардағы жол бойында самсап тұрған камералар жол қа­уіпсіздігі ісінде пайдасын көр­сетіп те жатыр. Жүргізуші мәде­ниеті қалыптасқанша, бұл да аса қажет амалдың бірі болып тұр. Ал бейнекаме­ра жоқ жерлерде көлік жүргізу мәде­ние­тінен жұрдай жүр­гізушілер тым еркінсіп кететіні – ащы шындық.

Бейнекамера демекші, таяу арада Қарағанды, Теміртау, Жезқазған, Сәтбаев және Са­ран қалаларындағы автомобиль жолдары бойында құқық бұзушылықтарды тіркейтін қосымша 100 камера жұмыс іс­тей бастайды. Қырағы көз құ­рылғылар  жол қауіпсіздігі ере­желері талаптарының сақ­та­луын автоматты режімде бақы­лай­тын болады.

Сонымен қатар «Қауіпсіз қала» жобасы аясында 100 аппараттық-бағдарламалық кешен орнатылатынын да айта кеткен ләзім. Олардың жиыр­ма­сы жол қиылыстарында жол қозғалысы ережелерін бұзу­ды тіркеп отырса, тағы бір­нешеуі тоқтау сызығының қиы­лы­суы және бағдаршамның қызыл сигналына өту сияқты бұзушылықтарды анықтайды. Ал 80 камера жылдамдық ре­жімі­нің бұзылуын қадағалайтын болады.

Жалпы, жол қауіпсіздігін сақ­тап, апаттардың алдын алу сияқты күрделі мәселені ке­шен­­­ді түрде шешпесе, іс алға бас­­пайтыны айтылды атал­ған басқосуда. Бұл жерде дамыған елдердегі озық тәжірибелерге сүйенгеннің де еш сөкеттігі жоқ. Бір сөзбен айтқанда, жаңалық атаулыны адамның жол үс­тін­дегі өмірі сынға түскен бұл са­ла­ға аямай енгізу керек болып тұр.

Бір ғана мысал: жол-көлік оқиғасы болған жерде «Дрон» құрылғысын пайдаланса, апат­тың компьютердегі сызба­сын айна-қатесіз түсіруге көмегін тидіруші еді. Мұның өзі жол-көлік оқиғасы бойынша ма­те­риалдардың сапалы және нақты болуын қам­та­ма­сыз етіп қой­май, бұл іс-шараға кететін уақытты азайтып және көлік кептелісінің мейлінше аз болуына игі ықпалын тигізер еді.

 

Қарағанды облысы

 

Соңғы жаңалықтар

Түркістанда үшем дүниеге келді

Аймақтар • Бүгін, 12:50

Ертең Үкімет отырысы өтеді

Үкімет • Бүгін, 11:31

Тәуелсіздік тұлғалары

Елорда • Бүгін, 09:16

Аида – әлем чемпионы!

Спорт • Бүгін, 09:14

Алматы қаласы «сары» аймаққа өтті

Коронавирус • Бүгін, 09:09

«Ақ бидай» ойындары аяқталды

Ұлттық спорт • Бүгін, 09:03

Жастар жәрдемі

Аймақтар • Бүгін, 08:55

Сенім арт маған, туған ел!

Аймақтар • Бүгін, 08:54

Сақтанған сау қалады

Медицина • Бүгін, 08:47

Оқушыларға абай болайық

Аймақтар • Бүгін, 08:42

Дамудың сенімді іргетасы

Қазақстан • Кеше

Іні-досқа ілтипат хат

Руханият • Кеше

Ұқсас жаңалықтар