Коронавирус • 10 Тамыз, 2021

Ахуал алаңдатарлықтай

285 рет
көрсетілді
4 мин
оқу үшін

Денсаулық сақтау министрі Алексей Цой Атырау облысына жұмыс сапары барысында Мақат аудандық ауруханасы мен Бәйгетөбе ауылдық фельдшерлік-акушерлік бекеттің жұмысымен танысты. Содан соң Атыраудағы эпидемиялық ахуалға байланысты аймақтық штабтың отырысын өткізді.

Ахуал алаңдатарлықтай

Қазір бұл өңірдегі ауруханаларда төсектік орынмен қамту біртіндеп ұлғайып барады. Мәсе­лен, 5 тамызда стационарларда емделіп жат­қан науқастар саны 1 734-ке жетті. Бұл бір ай бұрынғы статистикадан 3,5 есеге көбейгенін көрсетеді. Жансақтау бөліміне 76 пациент түсіп, 5 шілдеден бері 2,5 есеге көбейген.

Қазір облыста 16 инфекциялық стационар бар. Оның жетеуі аудандарда, ал тоғыз стационар облыс орталығында орна­лас­қан. Атырау қаласының өзінде төсектік орын жүк­темесі артқан. Мұнда алты ста­цио­нар­дың төр­теуіндегі жүктеме 97%-ды құрай­ды. Осы­лай­ша, мұнайлы шаһарда инфек­циялық төсектік орынның жүктемесі 60%, реанима­ция­лық кереуеттер жүктемесі 67%-ға ұлғайып отыр.

Сондай-ақ модульді ауруханада төсектік орынның жетіспеушілігі байқалады. Мұнда 200 төсектік орынға есептелген инфекциялық ста­цио­нарда 205 адам, оның ішінде 105 жүк­ті әйел ем алып жатыр. Жансақтау бөлімінде 25 пациент бар, оның үшеуі – ауыр халдегі жүкті әйел.

– Бұл – алаңдаушылық туғызатын жайт. Өйткені жүктеменің артуы төсектік орын­ның жетіспеушілігіне, тұрғындарға стацио­нар­лық көмек көрсетудің төмендеуіне әкеліп соғуы мүмкін, – дейді министрдің орынбасары Ажар Ғиният. – Министрліктің жұ­мыс тобы Атырау қаласындағы бес емха­на­да, екі жекеменшік емханада, сондай-ақ екі аудандық ауруханада мониторинг жүр­гізді. Талдау нәтижесінде жылжымалы брига­далар санының жеткіліксіздігі, тұр­ғындардан түскен шақыртулардың кешенді медициналық ақпараттық жүйеге уақытында енгізілмегені байқалды. Бұдан соң бір жылжымалы бригаданың нақты жүктемесі қанша екенін білу қиындайды. Осындай себеппен министрліктің ұсынысымен Аты­рау қаласында науқастардың тіркелуін, мо­бильді топтардың жұмысын бақылау үшін ахуалдық орталықтар құрылды. Оған нау­қастарды ауруханаға жатқызу, амбу­латорлық емнің уақтылы тағайындалуы, дәрі-дәрмекпен тегін қамтамасыз ету кіреді.

А.Ғинияттың айтуынша, барлық меди­циналық ұйымда науқастарды амбула­то­риялық бақылау тиісті деңгейде еместігі анық­талған. Бақылау парақтары сапасыз жүр­­гізілген. Коронавирус инфекциясын жұқ­тыр­ған­дарды емдеуге арналған кли­ни­калық хаттамалар сақталмайды. Дәрі­гер­лер егде жастағы емделушілерді бақы­лауда енжарлық танытып отыр. Жыл­жы­малы бригададағы дәрігерлер учас­­келік қабылдаудағы жұмыспен біріктіре атқа­­ра­тыны кездеседі. Бұл санитарлық-эпи­демиялық режім талабына қайшы келеді.

Министр А.Цойдың пікіріне сүйенсек, Атырау облысында тұрғындардың сани­тар­лық-эпидемиялық талаптар­ды сақ­та­мауынан коронавирус инфекция­сының таралуы едәуір ұлғайып отыр. Науқастарды ауру­­ханаға жатқызу пайызы жоғарылап барады. Ал «Дельта» штамының тара­луын тежеуге қатыс­ты іс-шараның, амбу­ла­тор­лық-емхана­лық жұ­мыстың жеткі­ліксіз ұйымдас­тырылуы жағ­дайы ауыр науқас­тардың көбеюіне ықпал еткен.

Ал кеше «Теңізшевройл» ЖШС «Теңіз» кені­шінде вахталық ауысымды уақыт­ша тоқ­татты. Бұған кен орнындағы инфек­циялық ста­цио­нарда емделіп, күн сайын коронавирус жұқ­тыр­ған науқастар санының көбеюі себеп болған.

– Біздің компаниядағы негізгі басым­дық – қызметкерлердің денсаулығы мен қауіпсіздігін сақтау. Осыған байланысты «Теңізшевройл» қызметкерлері арасында COVID-19 індетінің таралуын азайту үшін 9 тамыздан бастап «Теңіз» кенішіндегі жедел емес қызметкерлердің вах­талық ауысымын және қайта жұмылдыруын уақыт­ша тоқтатады. Аталған уақытша шараның «Теңіз» кенішінде жүргізіліп жатқан жос­парлы жөндеу жұмыстарымен айналысатын қызметкерлерге қатысы жоқ, – деп хабарлады кәсіпорынның баспасөз қызметі.

«Теңіз» кенішінде вирустың таралуын тежеу үшін қауіпсіздік шаралары, оның ішін­де қызметкерлерді «бөлек жайғастыру» (тұр­ғын үйлерде, көлікте және жұмыс орындарын­да), сондай-ақ ПТР-сынамасы мен оқшаулау бұрынғыша сақталады. Қазір кен орнына жұмысқа тартылған жұмысшылар арасында вакциналау бағдарламасы жалға­сып жатыр. Коронавирус инфекциясына қар­сы вакцинаның алғашқы компонентін сал­дыр­ған қызметкерлер саны 45 мыңнан асты.

 

Атырау облысы