РБК Талибандардың Ауғанстандағы позициясының күшеюі аясында Норвегия мен Дания Кабулдағы елшіліктерін уақытша жауып жатқанын жазады.
Норвегияның сыртқы істер министрі Ине Эриксен Серейде елшіліктің барлық қызметкері Норвегияға көшірілетінін айтты.
«Бұл жұмысшыларға да, ауғандықтарға да қатысты», деді ол.
4 тамызда Норвегия билігі өз азаматтарын Ауғанстаннан кетуге шақырды.
Германия алдағы бірнеше күн ішінде Ауғанстан астанасындағы елшілігінің қызметкерлерін «абсолюттік минимумға» дейін қысқартатынын хабарлады. Жұмысшылар чартерлік ұшақтармен шығарылады. Неміс дипломаттарымен жұмыс істеген ауғандықтар да эвакуациялануда. Визасы жоқтар үшін қажетті құжаттар Германияда беріледі.
АҚШ та дипломаттарын қысқартады. CNN АҚШ Мемлекеттік департаментінің өкілі Нед Прайсқа сілтеме жасай отырып, Кабулдағы американдық дипломаттар мен АҚШ елшілігі қызметкерлерін эвакуациялауды қамтамасыз ету үшін 3 мыңға жуық американдық әскер Ауғанстанға жіберілетінін хабарлады.
Ұлыбритания Ауғанстанға эвакуацияға көмектесу үшін 600-ге жуық әскер жібереді, деп хабарлайды The Washington Post.
Ресей әзірге дипломаттарды эвакуациялауды жоспарлап отырған жоқ.
«Елшілік эвакуацияға дайын емес, мұндай мүмкіндік қазір қарастырылмаған», деп хабарлады дипломатиялық өкілдігі ТАСС-қа берген мәліметінде.
Тәжікстан Мазари-Шариф, Файзабад және Бадахшан провинцияларындағы консулдықтарды уақытша жапты, ал Кабулдағы елшілік жұмысын жалғастырып жатыр, деп жазады Sputnik Тәжікстан.
Қазақстанның Сыртқы істер министрлігі Ауғанстандағы дипломатиялық миссияның жұмысы туралы әлі ресми мәлімдеме жасаған жоқ.
Америка Құрама Штаттары әскерін шығара бастағаннан кейін Ауғанстандағы жағдай ушығып кетті. АҚШ президенті Джо Байден елдегі әскери миссия 2021 жылдың 31 тамызында аяқталатынын хабарлады. Осы уақытта Талибан радикалды қозғалысы ауқымды шабуыл ұйымдастырып, көптеген провинцияны басып алды. Оның қатарында елдегі ауқымы бойынша екінші орындағы Кандагар қаласын, сондай-ақ үшінші орындағы Герат қаласы бар.
Айта кетейік, Талибан ұйымына Қазақстанда тыйым салынған.
