Спикердің айтуынша, көктемде қалада 64 мың көшет отырғызылды, күзде тағы 300 мың түп отырғызу жоспарлануда. Былтыр отырғызылған 282 мың көшеттің 16 пайызы жерсінбеді.
«Рас 44 мың ағаш тамыр жайған жоқ. Қурап кетті. Стандарттар бойынша ағаштарды жаппай отырғызу кезінде 15 пайызы жерсінбейді. Сондықтан бізде тек бір пайыз ғана артық. Біз 2019 жылдан бері отырғызған барлық көшеттерді жүйелі түрде бақылап отырамыз. Әрине, кейбір түрлері боынша қиындықтар бар. Мысал ретінде Алатау ауданындағы қарағай тоғайын алуға болады. Қарағай мен шыршалардың ашық күн астында тамыр жайып кетуі өте қиын. Себебі, олар тау бөктерінде өсетін ағаштар. Қазір біз оларды емдеп жатырмыз», деді Наталья Ливинская.
Басқарма басшысы биыл тамыр жаюы төмен әрі ауруға бейім ағаштар отырғызылмайтынын айтты.
«Біз ағаш күтіміне, жасыл қорды сауықтыруға және биоәртүрлілікті сақтауға көштік. Алматының жасыл желектерін суландыру үшін жаңа скважиналар салынды, суармалы арық торабына инвентаризация жүргізілді, суару жұмыстары күшейтілді», деді Жасыл экономика басқармасының басшысы.
Наталья Ливинская қалада отырғызылған өсімдіктердің ауқымы климат пен топырақ құрамына байланысты ғылыми қауымдастықпен, ландшафт мамандарымен бірге іріктелетінін алға тартты.
«Бұл ретте жасыл желектердің тізілімі қалыптасты, онда әр талдың электронды паспорты бар. Реестр жасыл қордың сапалық және сандық жағдайының есебін жүргізуге мүмкіндік береді. Жүйе сонымен қатар отырғызу алаңдарын, оның ішінде өтемақыны бақылауға мүмкіндік береді. Жүйе барлығына 2021 жылдың қыркүйегінен бастап басшылықтың ресми сайтында қолжетімді болады», деді басқарма басшысы.
Енді қаладағы ағаштарды сауықтандыру мен емдеу жұмыстары, зинякестер мен зеңге қарсы төрт рет биологиялық өңдеу жұмыстары қатар жүргізілуде.
