Еңбекқор адамның еңсесі тік болады

Бір таңданарлығы, Құрманбектің өмірлік жары да теміржолда еңбек еткен. Есімі – Гүлден. Екеуі 1974 жылы отау құрған. Содан бері ерлі-зайыптылар өздері шамшырағын жаққан шаңырақтың шуағына бөленіп келеді. Төрт ұлы мен үш қызынан отыздан астам немере-жиен, екі шөбере сүйіп отыр.

– Еңбек жолымды 1969 жылы Құрман­ғазы ауданындағы Орлы орта мектебін бітірген соң шөп шабатын мехнизаторға тіркеуші болып бастадым. Сол жылы күзде әскер қатарына шақырылдым. Екі жылдық әскерден оралып, 1971 жылы темір жол саласына бет бұр­дым. Бастапқыда Ганюшкиндегі №57 дис­танциясында жол жөндеуші болдым. Екі жылдан кейін дистанция басшылары Жам­был қаласына 11 айлық курсқа жіберді. Бұл курстың теміржолшы ретінде білімім­ді шыңдауға көп септігі тиді, – дейді өмір­лік кәсібін теміржолмен байланыстырған Құрманбек Кенжешов.

Күні-түні батыс пен шығысқа ауыр-ауыр вагондар құрамын салдыр-гүлдір қозғап, алыс стансаларға сүйреген тепловоздардың тоқтаусыз жүруіне тікелей септігі тигеніне марқаяды. Өйткені әр стансаның жанынан «ысқырып» өтетін, кейде сағаттап кідіретін теп­ловоздардың тоқтаусыз жүруі жол жөн­деу­­шілер мен монтерлердің білікті­лігіне ты­­ғыз байланысты. Сол себептен 11 айлық курс­­тан кейін 4-дәрежелі монтерлік кәсіпті мең­­герген Құрманбек Кенжешов өз ісін жауап­кер­шілікпен атқарудан жаңылмады. Ең­­бек­­қор­лықты басты қағидасына айнал­дыр­­­ған ке­йіп­керіміз басшылар жүктеген әр тап­­сыр­­маны тиянақты орындап, әсіресе жас­тарға өнеге көрсетті. Содан шығар, 1974 жы­­лы №8 темір жол бекеті ашылып, темір­­жол­­­­шыларға жетекшілік ететін брига­дир­­лік мін­­дет Құрманбекке жүктелді. Басшы­лар­­дың мұн­­дай таңдауы оны одан әрі ширықтыра түсті.

Оған өмірлік жары Гүлден Мұхамед­жанова ұдайы қолдау көрсетті. Себебі екеуі де дана Абай ұлағат еткендей, «Еңбек қыл­май, тапқан мал дәулет болмас, қардың суы секілді тез суалар» дегенді басты қағи­да­сына балады. Екеуінің ұстанымы – адал еңбек ету. Маңдай термен тапқан нанның дәмі тәтті боларын білді.

– Құрманбектің отбасына 20 жасымда келін болып түскен едім. Ата-енем – өмірден түйгені мол, өте керемет жандар. Екінші дү­ние­жүзілік соғысқа қатысқан атамыз бей­біт күннің, адал еңбектің қадірін білетін. Ал­ғашқы немересі өмірге келгенде, қуа­нышында шек болмады. Ал енеміз мені қызын­дай көріп, бауырына тартты. Білме­генімді үйретті, ақыл-кеңесін берді. Екеуі де «тату-тәтті, қайырымды, қарапайым болыңдар, бірлікке ұйыңдар» деп отыратын. Осының бәрі қайталанбайтын өнегеге толы тәрбие ғой. Қазір келіндерімнің маңдайына шаң тигізгім келмейді. Бір үйде екі бала-келінмен бірге тұрамыз, – деп ақтарыла сыр шертеді Гүлден Мұхамеджанова.

Ата-енесінен алған осынау тәлімді Гүл­ден бойына сіңіріп, санасына түйді. Қинал­­ған жанға көмек берді. Қайырымды­лық танытудан жалықпады. Құрманбектің үлкен әп­кесі өмірден өткенде артында қалған төрт бала­­сына бар мейірін төгіп, бауырына бас­ты. Қайы­н­ағасының бес баласына да сон­дай ша­р­апаты тиді. Бәрін өз баласындай тәрбиеледі.

Ерлі-зайыпты теміржолшылар ұлағатты ұрпақ тәрбиеледі. Балалары әр салада еңбек етеді. Айбек пен Төлеби мұнай саласын таң­дады. Мейрамгүл мен Анаргүл – мұғалім, Ба­қыт – мемлекеттік қызметші. Меди­ци­на­лық кол­­леджге оқуға түскен Махамбет қазір әскер қата­рын­да борышын өтеп жүр. От­басылық кәсіп­тің ізін жалғаған Асылбек 2006 жылдан бері вагон құрастырушы болып жұмыс істейді.

– Темір жол саласын таңдауыма әке-шешемнің еңбекқорлығы әсер етті. Құрметті теміржолшы атанған әкем мен оған қолдау білдірген шешемді үлгі тұтамын. Олардың абыройлы ісін жалғастыру – парызым, – дейді ұлы Асылбек. 

Қазір екеуі де зейнеткер болғанымен, үйде қол қусырып отырмайды. Отағасы шарбағына сиыр мен түйе байлап, қой өсіреді. Ал отанасы он жылдан бері бақ­шасын баптап, немерелерін еңбекке баулып келеді. «Абыройдың да, берекенің де бастауы – адал еңбекте. Еңбекқор адамның абыройы биік, еңсесі тік болады. Ешкімнің ала жібін аттамай, жұмыс істеуден жалықпадық. Бізді еңбекқорлық қана абыройлы, танымал етті», дейді ерлі-зайыпты теміржолшылар бір-бірінің ойын оқып қойғандай.

Атырау облысы