– Өкінішке қарай, індетпен күрес шарасының қарқынды жүргізілуіне қарамастан, науқастар саны төмендемей отыр. Аймақтағы ауруханаларға күн сайын 200-250 шамасында адам коронавирус инфекциясын жұқтырып, түсуде. Мысалы, соңғы тәулікте 218 жағдай анықталды, оның ішінде 35 баланың індет жұқтырғаны мәлім болды. Ауырған адамдардың жас ерекшелігіне қарасақ, науқастардың 43 пайызы 50 және одан жоғары жастағы адамдар екені анықталып отыр. Ал 30-49 жас аралығындағы науқастар үлесі 30 пайыз және 20-29 жас аралығындар 17 пайызды көрсетті. Сондай-ақ, жалпы ауырғандардың 10 пайызын 14 жасқа дейінгі балалар құрап отыр, – деді Президент жанындағы Орталық коммуникациялар алаңында өткен арнайы баспасөз мәслихатына қатысқан Алматы облысы әкімінің орынбасары Батыржан Байжұманов.
Бүгінде облыс аумағындағы инфекциялық стационарлар 40 пайыз шамасындағы жүктемемен жұмыс істеп тұр екен. Яғни 6 080 науқасқа арналған төсектік орында 2 404 адам ем қабылдауда. Оның ішінде, реанимация бөлімдерінде 72 науқас жатыр. Ал амбулаториялық емдеуде 5 371 пациент бар болса, оларға 391 мобильді бригада қызмет көрсетуде. Жалпы, 1 қыркүйектен бері аталған мобильді топтар 18 мың адамға көмек берген. Сонымен қатар облыс бойынша 206 жедел жәрдем бригадасы үздіксіз жұмыс істеп жатыр.
Індет таралуының алдын алу бойынша атқарылған жұмыстардың ішінде тұрғындардың вакцина алуы мен қызмет көрсету саласындағы нысандардың Ashyq бағдарламасымен қамтылуы туралы айтуға болады. Облыс әкімі орынбасарының айтуынша, облыста 8 747 кәсіпкерлік нысаны Ashyq бағдарламасы бойынша QR-код алған. Ал «Ashyq көшбасшысы» мәртебесі 102 кәсіпкерлік нысанына берілген көрінеді.
– Бағдарламаның қолданысқа енуі сақтық шарасын қамтамасыз етуге мүмкіндік беріп отыр. Мәселен, 10 маусым мен 10 қыркүйек аралығында облыс бойынша «қызыл» мәртебесі бар 2 115 адам және «сары» мәртебесі бар 785 тұрғын тіркелді. Сондай-ақ, Ashyq бағдарламасы бойынша анықталған «қызыл» мәртебесі бар тұлғаларға қатысты 3 млн теңге сомасына 79 айыппұл салынды. «Сары» мәртебесі бар азаматтарға қатысты үй карантині шарттарын сақтау қажеттілігі туралы талаптармен 284 қаулы қабылданды, – деді Алматы облысы әкімінің орынбасары.
Айтпақшы, Алматы облысының мектептеріндегі 56,9 мың мұғалімнің 50,1 мыңы коронавирусқа қарсы екпе алған көрінеді. Ал 6,4 мың мұғалімнің вакцинаға қарсы көрсетілімдері бар екен.
– Жаңа оқу жылында облыстың 763 жалпы білім беретін мектептерінде 442 420 оқушы білім алуды бастады. Бүгінгі күні штаттық режімде 376 809 оқушы оқиды. Аралас форматта 64 995 оқушы оқытылуда. Бізді балалар арасындағы індеттің таралуы алаңдатып отыр. Атап айтқанда, сабақ басталғалы бері 18 балабақша тәрбиеленуші мен 422 оқушының індет жұқтырғаны анықталды. Бүгінде 31 бала стационарда ем қабылдауда, – дейді Б.Байжұманов.
Жалпы, жетісулықтарды індетке қарсы вакцинамен қамту жоспары 65 пайызға орындалған. Оның ішінде екпені 100 пайыз салдырған аудандар да бар. Мысалға, Балқаш ауданы бойынша 107 пайыз, Ақсу ауданы бойынша 103 пайыз тұрғын екпе алған екен. Ал өңірде вакцинаның бірінші компонентімен 711 мың адам егілсе, екінші компонентін 594 мың тұрғын салдырған.
Алматы облысы
