Еңбекпен есейген ер

1982 жылы Шымкент қаласындағы Қазақ химия-технология институтын аяқтаған жас Мұқаш сол кездегі Жамбыл қаласында орналасқан «Жаңа Жамбыл фосфор зауыты» мекемесіне ауысым шебері болып орналасады. Ол кезде аталған кәсіпорынның екінші ке­зеңі­нің құрылысы жүріп жатқан екен. Бала күнінен химия пәніне айрықша қызыққан, тіпті аталған пән мұғалімі Қоңыржан Талқанбаеваның үйіне аптасына үш-төрт рет барып, сабақ алып жүріп, білімін жетілдірген ол кейін де із­де­нісін тереңдете түседі. Жас маман өзі­нің білім-білігін көрсету үшін, оны дәлел­деу үшін алдына мақсат қояды. Сол мақ­сат үдесінен шығу үшін әрі қарай іздене береді.

Еткен еңбек елеусіз қалмай, Мұқаш Ескендіров әр жылдары 4-цех бастығы, зауыттың партия комитетінің хатшысы, директордың сыртқы экономикалық қызмет жөніндегі орынбасары болып қызмет істейді. Тәуелсіздіктің алғаш­қы жылдарында да кәсіпорынның күр­де­лі мәселелерін шешуге атсалысып, еңбек етеді. Ал 1999 жылы Елбасы Нұрсұлтан Назарбаевтың ықпал етуі­мен құ­рамына бірнеше зауыт кіретін «Қаз­фос­фат» жауапкершілігі шектеулі серік­тес­тігі құрылады.

Нұрсұлтан Әбішұлы Жамбыл облысына жұмыс сапарымен келген са­йын аталған кәсіпорынға келіп тұрды. Елі­міздегі химия өндірісіне мән беріп, мейлінше бұл салаға қолдау көрсетті. Соңғы 17 жыл бойы Мұқаш Ескендіров алып «Қазфосфат» кәсіпорнының бас директоры қызметін атқарды. Қарапайым ауысым шебері болып келіп, қырық жыл бойы қайнаған еңбектің ортасында болып, оның әрбір сатысынан өткен Мұқаш Ескендіров 2015 жылы Қазақстанның Еңбек Ері атағын алды. Бұл да талай жылғы тынымсыз еңбектің нәтижесі еді.

Мұқаш Ескендіровте қарапайым ең­бек адамына тән мінез бар. Бала күні­нен еңбекпен есейген, шопан болып еңбек еткен әкенің тәрбиесін көрген бүгінгі Еңбек Ері қазіргі жастар өндіріс сала­сына барып жұмыс істесе екен дейді. «Кезінде кәсіпорындарда жұмыс істеу лауазымды қыз­метпен бірдей дәре­же еді. Кейінгі жас­тар да өндіріс сала­сында жұмыс іс­тесе екен деймін. Ол үшін білім керек. Ма­мандыққа адал болу керек. Жалпы, өндіріс саласы адамды аш қалдырмайды. Мәселен, мен «Қазфосфат» кәсіпорнын басқарып жүр­генде бізде 6500 адам жұмыс істеді. Оның 40 пайызы – жас­тар. Ішінде қазақтың балалары мен қыздары да бар. Бәрі де еңбек етті. Өзім де ұзақ жылдар бойы еліміздегі химия өндірісінің дамуына үлес қосқаныма қуаныштымын», дейді ол.

Қай кезде де қарапайым қалпынан танбаған, еңбекпен есейген ер Мұқаш Ескендіров Әулиеата өңірінің әлеуетін арт­тыруға да өзіндік үлесін қосты. Бір­қа­тар спорт нысанының салынуы­на демеушілік жасап, жастарға қол­дау көр­сетті. «Еңбектің наны тәтті» дейді ха­лық. Адал еңбек адамды қай кезде де биікке жетелеп, ұшпаққа шығаратыны сөзсіз. Еңбек адамдары қоғамда қандай құрметке болса да лайықты.

Ал өз саласында ерен жетістікке же­тіп, көптің көзайымына айналған аза­маттар да – елдің мақтанышы. Мұқаш Ескендіров сияқты нағыз еңбек ада­мы­ның өмір жолына қарап отырып, кез келген жетістікке жету үшін еңбекпен қа­тар білімнің де қажет екенін көруге болады. Көрген, көңілге түйген нәрсенің нәтижесінің де болатыны анық.