Тұжырымдаманың негізгі мақсаты - республика азаматтарының денсаулығы мен әл-ауқаты үшін елдің су ресурстарын сақтау және ұтымды пайдалану, экономика салалары мен қоршаған орта қажеттілігінің теңгерімін қамтамасыз ету проблемаларын шешу.
Тұжырымдама су ресурстарын интеграцияланған басқару практикасын жақсарту және елді дамытудың 2025 жылға дейінгі ұлттық жоспарында айқындалған мақсаттарға, міндеттер мен тәсілдерге және Біріккен Ұлттар Ұйымының орнықты даму мақсаттарына қол жеткізуге бағытталған су қорын пайдалану мен қорғау саласындағы мемлекеттік саясатты іске асыру үшін негіз болады.
«Су ресурстарын басқару жүйесіндегі қалыптасқан жағдай су ресурстарын басқару барлық деңгейлерде біртұтас болып табылатын интеграцияланған тәсілді енгізу есебінен мемлекеттің су шаруашылығы саясатын түбегейлі жетілдіруді талап етеді», делінген құжатта.
Экономикалық дамыған елдердегі жаңа су парадигмасы «ресурсты басқарумен» қатар суға деген сұранысты басқаруды, атап айтқанда суды үнемдеу және суды пайдалану тиімділігін арттыру арқылы бірдей қажеттіліктерді қанағаттандыру үшін судың аз мөлшерін пайдалануды көздейді.
Сұранысты басқару практикасы суды үнемдеудің материалдық ынталандыруларын, озық технологияларды, қоғамдық оқытуды қамтиды, бұл тиімділікті арттыруға, суды үнемдеуге және суды қайта пайдалануға әкелетін инновацияларға түрткі болады.
Су ресурстары бүкіл су экожүйесінің тұтастығын сақтай отырып, экожүйенің басқа компоненттерімен бірлікте қарастырылады.
Су ресурстарын басқарудың экологиялық аспектілері екі бағытта іске асырылады: судың зиянды әсерін болдырмау (су тасқыны, су басу) және суға табиғат талаптарын сақтау.
Бұдан басқа, тұжырымдаманы іске асыру жөніндегі іс-қимыл жоспары әзірленді.
Құжаттар 16 қарашаға дейін көпшілік талқылауы үшін «Ашық НҚА» сайтында орналастырылған.
