Алыстағы ауылдың қарапайым мұғалімі 1 млн теңгенің грантын жеңіп алды. Бастауыш сынып мұғалімі Лидия Гура Красная – Нива ауылының тумасы. Оның анасы да осы ауылдың мектебінде жұмыс істеген.
– Мен туған жерімді және мектебімді шын жүрегіммен жақсы көремін. Оқушыларымыздың дені сау, мықты және төзімді болғанын қалаймын. Мектептегі спорт залы – балалар спортпен шұғылданатын жалғыз ғана жер. Бірақ бізде құрал-жабдық жағы жетіспеді. Сондықтан менің жобам осы олқылықтың орнын толтыруға арналды, – дейді ауыл мұғалімі.
Лидия Гура ұтып алған грант қаражатына мектеп оқушыларына арналған барлық қажетті спорттық құрал-жабдықтар – баспалдақтар, турниктер, қырлы бөренелер мен арқандар, күрес кілемі, күрес манекені, теннис үстелі, шахмат, тоғыз құмалақ, қазақ күресінің күртешелері, сондай-ақ волейбол, баскетбол, футбол жабдықтары және басқа да керек-жарақ сатып алынды.
Лидия Гура енді 50 бала оқитын аядай мектепте физика, химия және биология сабақтарына қажетті құрал-жабдықтар болса екен деп армандайды.
Қарағанды облысы,
Бұқар жырау ауданы,
Красная Нива ауылы
