Түрікменстанның Қазақстандағы Төтенше және өкілетті елшісі Батыр Реджепов жиында соңғы уақытта белсенді дамып келе жатқан Түрікменстан-Қазақстан бауырластық қатынастарына ерекше назар аударды. Елші атап өткендей, Түрікменстан БҰҰ Бас Ассамблеясының тиісті қарарларымен екі рет расталған өзінің тұрақты бейтарап мәртебесіне сүйене отырып, әлемнің көптеген елімен белсенді және сындарлы диалог жүргізуді қолдайды. Бұл тұрғыда Қазақстанмен өзара байланыстарды дамыту және нығайту Түрікменстанның сыртқы саяси күн тәртібінде маңызды орын алады. «Түрікменстанның бастамасымен 2021 жыл Бейбітшілік және сенім жылы деп жарияланғаны белгілі. Өйткені Түрікменстанның бейтараптығы бітімгершілік, бейбіт сипатқа ие. Біз бүкіл әлемде бейбітшілікті насихаттаймыз», деді Б.Реджепов.
Сондай-ақ елші Қазақстан мен Түрікменстан арасындағы екіжақты ынтымақтастыққа тоқталып өтті. Қазіргі таңда саяси-экономикалық және сенімді серіктестік негізінде құрылған Түрікменстан-Қазақстан диалогы жаңа серпін мен мазмұнға ие. Біздің мемлекеттің өзара ынтымақтастығы жеке мүддені көздемейді. Түрікменстан мен Қазақстан Еуразия кеңістігінде игілікті мақсаттарды жүзеге асыруда екіжақты күш-жігер мен инфрақұрылымды біріктіріп, нәтижесінде ауқымды жобалар іске асып жатыр», деді ол.
Түрікменстан елшісі елдің өңірлік және жаһандық қауіпсіздікті нығайту мәселелерінде де Қазақстанмен белсенді өзара іс-қимыл орнатқанын атап өтті. Елші ірі халықаралық ұйымдар шеңберінде ынтымақтастық пен бірлескен қадамдарды үйлестіру деңгейі жоғары екеніне ерекше тоқталды. Қазақстан тарапынан Түрікменстанның бейтарап сыртқы саяси бағыты мен оның бастамаларының, соның ішінде энергетика, көлік және экология сияқты халықаралық серіктестіктің маңызды бағыттары бойынша қолдау жоғары бағаланады. «Әртүрлі деңгейдегі жемісті мемлекетаралық байланыстар, яғни саяси-дипломатиялық, сауда-экономикалық және гуманитарлық-мәдени әріптестік өзара тиімді іс-қимылдың жарқын мысалы екенін айта аламыз», деді Б.Реджепов.
Түрікменстан мен Қазақстан БҰҰ-ның Қауіпсіздік Кеңесі, Экономикалық және әлеуметтік кеңес, Адам құқықтары жөніндегі кеңес және басқа да маңызды органдарына сайлауда өзара қолдау көрсетті. 2021 жылы Қазақстан БҰҰ қабырғасында Түрікменстанның бастамасы бойынша құрылған бейтараптық достары тобына және пандемия кезінде, сонымен бірге одан кейінгі Орталық Азиядағы превентивті дипломатия және көліктік ынтымақтастық тақырыбы бойынша қарарлардың бірлескен авторлығына қосылды. 2021 жылғы маусымда Елбасы Нұрсұлтан Назарбаевтың бастамасымен құрылған Азиядағы өзара іс-қимыл және сенім шаралары кеңесінің (АӨСШК) халықаралық форумында Түрікменстанға байқаушы мәртебесін беру туралы шешім қабылданды.
Мемлекеттер басшылары Гурбангулы Бердімұхамедов пен Қасым-Жомарт Тоқаевтың жүйелі кездесулері, олардың өзара жылы және сенімді қарым-қатынастары Түрікменстан мен Қазақстанның екіжақты және көпжақты форматта, бірінші кезекте ірі халықаралық ұйымдар аясында табысты құрылатын дәстүрлі әріптестікті жандандыру мен кеңейтуге ұмтылысының үздік дәлелі. Жиын барысында Б.Реджепов Қазақстан Президенті Қасым-Жомарт Тоқаевтың 2021 жылғы 5-6 тамыздағы Орталық Азия мемлекеттері басшыларының үшінші консультативтік кездесуіне қатысу мен Түрікменстанға сапары туралы егжей-тегжейлі айтып берді. «Қасым-Жомарт Тоқаевтың Түрікменстанға мемлекеттік сапары барысында Мемлекеттер басшылары Қазақстанда Түрікменстанның Мәдени күндерін атап өту туралы келіскеніне тоқталды. Ел Президенттерінің ресми кездесуінен кейін өзара байланыс қайта серпін алды. Бүгінде біз Түрікменстанның Мәдени күндерін атап өту мақсатында Қазақстанның Мәдениет және спорт министрлігімен бірлескен жұмыс істеп жатырмыз», деді Б.Реджепов.
Елшінің айтуынша, аталған мәдени шараны өткізу келесі жылға жоспарланып отыр. «Сондай-ақ мәдени шаралардан бөлек, екіжақты сауда-экономикалық қатынас та бір ізге қойылған. Олардың арасында ынтымақтастық туралы достық қатынастар туралы шарт бар. Одан бөлек, Түрікменстан Президенті Гурбангулы Бердімұхамедовтің 2017 жылы Қазақстанға жасаған мемлекеттік сапары шеңберінде қол қойылған стратегиялық әріптестік туралы шарт өз күшінде», деді елші.
