Аймақтар • 14 Желтоқсан, 2021

Қарағандыда «Қасым үйі» ашылды

322 рет көрсетілді

Осыдан бір жыл бұрын облыс әкімі Жеңіс Қасымбек жергілікті зиялы қауым өкілдерімен кездескенде ақын, Абай атындағы Мемлекеттік сыйлықтың иегері Серік Ақсұңқарұлы Қарағандыда «Қасым үйін» ашу жөніндегі идеясын айтқан болатын.  Сонда өңір басшысы бұл бастаманы қызу қолдап, оны іске асыруға уәде берген еді, деп жазады Egemen.kz.

Енді міне, кеншілер астанасының төрінде «Қасым үйі» пайда болып, оның ашылуына орай ұйымдастырылған салтанатқа Қазақстан Жазушылар одағының төрағасы Ұлықбек Есдәулет, белгілі жазушы, өлкетанушы Кәмел Жүністегі, ақындар Ғалым Жайлыбай, Маралтай Райымбекұлы және ғалым Қойлыбай Асанов арнайы келіп қатысты.

Қасым үйінің ашылу салтанатында Қарағанды облысының әкімі Жеңіс Қасымбек дауылпаз ақынның артында қалған шығармашылық қазынасының  ұрпақтан ұрпаққа мұра болып қалу керектігін атап өтті.

– Қасым Аманжолов – қазақ әдебиетінің інжу-маржаны. Биыл ақынның  туғанына 110 жыл толды және жыл бойы біз облыс бойынша осы мерейтой аясында 500-ге жуық түрлі іс-шара өткіздік. Атап айтқанда, Қарағандыда ақынның ескерткіші орналасқан көшеге Қасым Аманжоловтың есімі берілді. Облыста «Қасым» журналы шығарылады, онда еліміздің танымал әдебиетшілерінің шығармалары жарияланып тұрады. Жыл сайын Аманжолов оқулары, ғылыми-практикалық конференциялар, айтыс-мүшәйралар, поэзия кештері өткізіледі. Таяуда біздің өнерпаздарымыз елорда төрінде ақынның құрметіне үлкен концерт ұйымдастырды. Сәкен Сейфуллин атындағы академиялық қазақ драма театрының сахнасында «Рақымжанның Қасымы» қойылымының премьерасы өтті. Ал енді, бүгінгі Қасым үйінің ашылуы қарағандылықтар үшін өте маңызды және айтулы оқиға болды деп сеніммен айта аламын, – деді өңір басшысы.

1

а

Бұдан кейін ақындар Ұлықбек Есдәулет, Ғалым Жайлыбай және жазушы Кәмел Жүністегі сөз сөйлеп, Қасым үйінің ашылуына жоғары баға беріп, мұндай игі шаруаны сәтімен жүзеге асырған облыс басшылығына  ризашылықтарын білдірісті. Ал Маралтай Райымбекұлы дауылпаз ақынның рухына арнап өлең оқыды.

Есігін айқара ашқан Қасым үйінде ақынның мұражайы бар. Онда Қасым Аманжоловтың сирек кездесетін қолжазбалары, кітаптары мен жеке заттары және фотосуреттері қойылған. Сонымен қатар, ғимарат ішінде Қазақстан Жазушылар одағы мен Журналистер одағының облыстық филиалдары, Серік Ақсұңқарұлы атындағы бөлме, «Қасым» журналының редакциясы, сондай-ақ, өңірлік коммуникациялар қызметі де орналасқан. Бір сөзбен айтқанда, Қасым үйінің Қарағандыдағы шығармашылық иелерінің бас қосып, тілегін бір мақсаттың жолына жұмылдыратын киелі шаңырағы болатын түрі бар.

Салтанатты сәтте ақын Серік Ақсұңқарұлы Қасым үйі нағыз зерттеу орталығы, шығармашыл және ойшыл жастарды бауырына тартатын құтты ұя  болатынына сенім білдірді.

– Қарағандыда Қасым үйінің ашылуы ұлттық рухты, сананы жаңғыртуды айғақтайтын тарихи оқиға. Бұл үй Қасым Аманжоловтың өмірі мен шығармашылығын зерттеп, оны жаңа қырынан танитын нағыз зерттеу орталығы болады деп үміттенемін, – деді идея авторы Серік Ақсұңқарұлы.

Бұдан бөлек, іс-шара барысында Е.Бөкетов атындағы Қарағанды университетінің жанындағы «Қасым тағылымы» орталығының ақынның мұрасы туралы баяндайтын екі томдығы мен Жазушылар одағының облыстық филиалының төрағасы Жанат Жанқашұлының «Ойтамған» кітабының тұсаукесері ұйымдастырылды.

к

Е.Бөкетов атындағы ҚарУ-дың филология факультетінің деканы Елдос Түйте аталған орталықтың ұзақ уақыт бойы Қасым Аманжоловтың  шығармашылығы мен өмірін зерттеп келе жатқанын баян етті.

– Ғалымдарымыз экспедиция құрамында Алматы, Орал және Семей қалаларында  болды. «Екпінді құрылыс» газетінде жарияланған өлеңдері мен публицистикалық мақалаларын Орал мұрағаттарынан тапты. Алматыда Аманжоловтың қызы Дариға бізге сирек қолжазбалар мен жеке заттарын сыйға тартты. Ол, сондай-ақ, бізге ұзақ жылдар бойы жасаған картотеканы берді. Онда ақынның өмірі мен шығармашылығы туралы барлық мәліметтер қамтылған. Биыл біз Қасым Аманжоловтың өмірі мен шығармашылығының библиографиясын және төрт бөлімнен тұратын «Қасым тағылымы» жинағын шығардық, – деді Е.Түйте.

Кездесу соңында мәртебелі меймандар Қасым Аманжолов шығармашылығын одан әрі зерттеу, оны насихаттап, мол мұрасын өскелең ұрпақтың санасына жеткізіп, қолына тапсыру мақсатында бірлескен жұмыс идеяларымен бөлісті. Ақын-жазушылар мен ғалымдар құнды пікірлері мен ұтқыр ұсыныстарын ортаға салып, тағылымды іс-шараның маңызын арттыра түсті.

4

Соңғы жаңалықтар

Ұлы даланың ұлағаты

Аймақтар • Бүгін, 12:23

Ұстаздың аты өлмейді

Білім • Бүгін, 10:30

Карапастың қарқыны күшті

Спорт • Бүгін, 10:29

«Каспий» көш бастады

Спорт • Бүгін, 10:27

«Жас дарын» байқауы өтті

Аймақтар • Бүгін, 08:58

Элитадағы орнын сақтап қалды

Хоккей • Бүгін, 08:55

Адалдық пен шындықты шырақ етті

Қазақстан • Бүгін, 08:48

Ұқсас жаңалықтар