Елімізде соңғы 30 жылда табыстармен қатар кемшіліктер де болды. Сол қателіктерге көз жұма қарап, сападан гөрі сандық көрсеткіштерге көп мән беріліп кеткенге ұқсайды. Осы құбылыс өмірдің барлық саласын қамтығаны да белгілі. Оның, әсіресе, азаматтардың санасының улануына ықпалы зор болды. Одан басқа Батыстық либералдық демократиясының жымысқы әсерін де ұмытпаған жөн.
Тәуелсіздіктің 30 жылдығының салтанатты қорытындысы өткен жылдың соңында жасалса, оның шынайы және мазмұндық-сапалық бағасын, өкінішке қарай, террористердің шабуылына жол берілу фактісі беріп отыр. Осы ахуал Қазақстанның болашағына бейжай қарамайтын әрбір азаматқа басына жай түскендей әсер еткені рас. Бүгіндері халық кімге және неге сенерін білмей дал болып, бойларын үрей билеуде. Олар кешегі «гүлденген, тұрақты Қазақстанға ма, әлде бүгінгі күннің ақиқатына айналған «халықаралық деңгейде мойындалған жетістіктердің» көзден ғайып болып бара жатқан шындығына сенуі керек пе?
Олай болса, осыған дейін жүргізіліп келген мемлекеттік саясатты қайта қарап, «қозғауға болмайтын» тақырыптар мен сұрақтардың барлығының басын біржолата ашып, «көлеңкелі» саясаттың артында тұрған «қайраткерлер» мен «суға батпайтын, отқа жанбайтын» делдалдардың шынайы бетпердесін ашатын мезгіл келді. Қоғамды адамға қарсы қара күштерден осылайша тазартпай тұрып жағдайдың оңалуы екіталай. Өйткені кешегі күнге дейін өзіміз куәсі болған екіұштылық пен немқұрайдылыққа, нәтижесіз және сапасыз әрекеттерге, шалағайлық пен ат төбеліндей азғандай топтың ығына жығылып, олардың халық үстінен күн көруіне көз жұма қараудың қисыны бола қоймас. Конституцияға сәйкес барлық азаматтардың заң алдында құқықтарының теңдігі қағидатын қатаң еске салатын кез де келді. Сонда ғана олардың демократиялық құқықтары мен бостандықтары сақталатыны сөзсіз.
Әлемдік демократиялық үрдіс көрсеткендей, Батыстың тығырыққа тірелген және беделінен жұрдай болған «қос стандартты» заңға емес, өздеріне ыңғайлап ойдан шығарылған, қоғам тұрмақ табиғат заңына кереғар келетін, қайдағы бір «ережелер» мен «құндылықтар» сымақтарынан не қайыр. Анығында, бұл күштердің аңсайтыны Қазақстанды отқа орап, оның геостратегиялық маңызды кең-байтақ, асты мен үсті қазба байлыққа толы жеріне ие болу арқылы елімізді қуыршақ мемлекетке айналдыру. Қолдары қанға боялып, бүкіл әлемге аты шыққан террористік идеологияны ұстанған ланкестердің Алматы және Қазақстанның басқа да қалалардағы қатыгездігі мен қолданып жатқан тәсілдері осының нақты айғағы бола алады. Өйткені бұл ереуіл емес, нағыз соғыстың өзі.
Міне, осындай жағдайда Мемлекет басшысы Қ.Тоқаевтың ҰҚШҰ-ның көмегіне жүгінуі объективті қажеттілік және заңды шешім екендігін ескерген абзал. Себебі қалыптасқан ахуалды бейбіт шеру деп бағалау мүлдем мүмкін емес. Керісінше, бұл іс жүзінде, тәуелсіз Қазақстанның барлық территориясын дерлік бір мезгілде қамтып, бір орталықтан басқарылып, үйлестірілген, мұқият және арнайы дайындалып, алдын ала жоспарланған, шетелдік содырлардың қатысуымен ұйымдастырылған террорлық және қаскөйлік акт. Міне, осындай ашықтан-ашық еліміздің мемлекеттілігіне қауіп-қатер төніп, тәуелсіздігіміздің тағдыры сын тезіне түскен шақта ҰҚШҰ-ға арқа сүйегеніміз дұрыс болды. Мұндағы басты мақсат – елдігімізді сақтап қалу, Тәуелсіздік пен мемлекеттілігіміздің тұғырын шайқалтуға жол бермеу. Ол қоғамда тыныштық пен тұрақтылық орнатып, халықтың әлеуметтік-экономикалық жағдайын жақсартып, оның құқықтарын сақтауға мүмкіндік тудырады. Әлде бізге террористік шабуылдың зардаптарын еңсеруге көмектесемін деудің орнына, бүліктің шығу себептерін «шешуге» деп отырған АҚШ-қа арқа сүйеу керек пе еді? Жоқ, Қазақстан оған бара алмайды. Өйткені мұның артында адам құқықтары бұзылды деп бізді кінәлау мен санкция салу және т.б. жымысқы әрекеттердің тұрғандығы белгілі. Олай болса, Президенттің төңірегіне топтасып, халқымыздың бірлігін нығайту қажет.
Еліміздің жасандылық пен жалған жоспарлардан бас тартып, жаңа да жауапкершілігі жоғары, халық үніне құлақ асатын саясат жүргізуге кіріскені жөн. Жетістіктерімізді қайта қарап, осал тұстарымызды анықтауға мүмкіндік мол. Бұл бұрынғы заманның бітіп, етек-жеңімізді жинаудың, Қазақстанның жаңаруының бастауы болмақ.
