Түнгі рейдтің негізгі нысанасы Атмадағы ғимарат болған. Сирияның солтүстік-батысында орналасқан, Түркиямен шекаралас қалада он мыңдаған адам тұрады. Олардың барлығы – елдегі соғыс салдарынан қашып келген. Дегенмен дәл нысанадағы ғимаратты кімдер паналағаны туралы нақты ақпарат жоқ. Расталмаған дереккөздер АҚШ әскері «әл-Каида» мүшесін тұтқындауды мақсат етті дейді.
«Біз түнгі 1 шамасында тікұшақ дыбысынан ояндық. Одан кейін сағат 3-те оқ атылды. Кейін талқаны шыққан үйді көрдік, дегенмен бұл не үшін болғанын түсіндірген ешкім болмады», дейді ғимарат жанында тұратын Әбу Фахед әл-Хомси.
Тағы бір куәгер АҚШ әскері ғимаратты қоршап алғанын көргенін айтады. Тұрғынның мәлімдеуінше, олар дауыс күшейткішпен хабарландыру жасап, тұрғындардан ғимараттан кетуін сұраған. Ал операция аяқталғанда қаза болған адамдардың денесін көріпті.
Сирия азаматтық қорғанысы оқиғадан кем дегенде 13 адам қаза болғанын хабарлады. Жергілікті белсенділер содырлар әскермен қақтығысқанын айтады.
Пентагон бұған қатысты ресми мәлімдеме жасамады. Дегенмен баяндамаларында миссияның сәтті аяқталғаны туралы жазылған. «АҚШ Арнайы операциялар күштері АҚШ Орталық штабының басқаруымен Сирияның солтүстік-батысында өткен контртеррорлық миссиясын сәтті аяқтады» дейді Пентагон баспасөз хатшысы Джон Кирби. Оның айтуынша, толық ақпарат кейін жарияланады, АҚШ тарапынан адам шығыны жоқ.
