Қазақстан • 04 Наурыз, 2022

Ақсақалдар ақылдасты

142 рет көрсетілді

Қазақстан мұсылмандары діни басқармасының ұйымдастыруымен елордада «Қариялар – ел қазынасы» атты І республикалық ақсақалдар форумы өтті. Форумға ҚМДБ Төрағасы, Бас мүфти Наурызбай қажы Тағанұлы, Ақпарат және қоғамдық даму вице-министрі Серік Егізбаев, Ақсақалдар кеңесінің мүшелері Мырзатай Жолдасбеков, Өмірзақ Озғанбаев, Мұрат Жұрынов, Жабал Ерғалиев, Шалатай Мырзахметұлы, Марат Тоқашбаев сынды қоғам қайраткерлері қатысып, пікірлерін білдірді.

 

Жиында қазақ тарихындағы қария­лар­дың рөлі жөнінде тұшымды ойлар айтылып, тәрбиенің тірегіне баланған аталар мектебін қалыптастыру мәселесі сөз болған форумда халықты ізгілікке ша­қырған үндеуі қабылданды.

«Қазақ – адамның рухани болмысын жоғары бағалай білген халық. Жас буын өкілдерін тәрбиелеуде жүріс-тұрысынан даналықтың көркем үлгісі есіп тұратын дуалы ауыз ақсақалдарымыздың орны ерекше екені әмбеге аян. Өмір мек­те­бінің сан түрлі сатысынан өткен, көп­ті көрген, көргенін көкейге түйген ақсақалдардың кеңесі керек. Кешегі қаңтар қасіреті кезінде елге тоқтау айтып, жалаң ұранмен көшеге шыққан жастарды жөнге шақыратын үлкеннің пәтуалы сөзі қоғам үшін ауадай қажет болғаны айқын сезілді. Мен жыл басында еліміздегі барша дін қызметкерлеріне бағдарлық баяндамамды жолдадым. Бағдарлық баяндамада Қазақстан мұ­сыл­мандары діни басқармасы жанынан Ақсақалдар кеңесін құру туралы бастама көтердім.

Аллаға шүкір, игі бастаманың аясында Діни басқарма жанынан Ақса­қал­дар кеңесі құрылды. Жуырда осы кеңестің алғашқы басқосуын өткіздік. Кеңеске мүше болған мемлекет және қоғам қайраткерлері, зиялы қауым өкіл­дері, ардагер имам-ұстаздар парасатты пікірлерін ортаға салып, ортақ келісімге келдік», деді форум ашылуын­да сөз алған Бас мүфти Наурызбай қажы Тағанұлы.

Бас мүфти кеңес жұмыстарына тоқталып өтіп, ысырап пен шариғатымыз талап етпеген іс-әрекеттерді болдырмау мақсатында имамдардың кезекті фору­мы­нда «Ас беру мәдениеті», «Зират және зиярат мәдениеті» құжаттары қабылданғанын айтты.

Жыл басында ҚМДБ жанынан құ­рыл­ған Ақсақалдар кеңесіне жасы 60-тан асқан және ел алдында абыройлы-сыйлы қариялар шақырылған. Форумға да делегат ретінде өңірлерден 80-ге жуық ақсақал келген. «Біз, Алла қаласа, осы жылы республикалық дең­гей­де «Ақ бата» бата беру байқауын өткіземіз. Төрде отырып төрелік айтып, халықтың ауызбіршілігін сақтап келе жатқан абыз ақсақалдарымыз, алатаудай ақылшыларымыз, батагөй қарияларымыз, Аллаға шүкір, бүгін де бар. Сіздерді осынау игі іс-шара­мыз­ға белсенді түрде қатысуға, қазақ хал­қы­ның бата беру дәстүрін жаң­ғыр­ту­ға шақырамыз», деді Бас мүфти.

Наурызбай қажының айтуынша, ата мен баланың арасы алшақтай бас­таған мына заманда тәрбиенің тәсіл­де­рін ұтымды қолдануымыз қажет. Бас мүфти смартфон баланың алтын уа­қ­ытын ұрлап жатқанын, осындай мәселеге үйдің үлкендері мән беруге тиіс деп есептейтінін ортаға салды. «Сонымен қоса қазір әлемдегі өзекті мәселелердің бірі – түрлі діни ағымдар. Қазақ халқының салт-дәстүрі әрдайым Ислам дінімен сабақтасып келеді. Сол қазақтың салт-дәстүрін насихаттауда, діни жат ағымдардың алдын алуда ақса­қал­дармен бірігіп жұмыс істейміз деген ойымыз бар», деді ол.

«Қазіргі ел ақсақалдары, жалпы, қа­зақ ақсақалының тұлғалық келбе­ті қандай?» деген тақырыпта бір­н­е­­ше баяндама оқылды. «Осы фо­рум­нан кейін бата беру үлгілері жө­нін­де ақса­қал­дармен жиындар өткі­зіп, рес­пуб­ликалық бата беру сайы­сын өткізу жос­парда бар. Қазір ақса­қал­дар­дың дұрыс бата беруі, пәтуалы сөз айтуы өте қажет болып отыр. Бүгінгі форумда бар­лық ұсыныс-пікір жинақталып, ке­лесі форумдарда нақты құжаттар қа­был­даймыз деген ниетіміз бар», деп түйіндеді Бас мүфти Н.Тағанұлы.

Соңғы жаңалықтар

Алматыда троллейбус өртенді

Оқиға • 24 Маусым, 2022

ТүркПА-ның атауы өзгереді

Парламент • 24 Маусым, 2022

Ұқсас жаңалықтар