Коллажды жасаған Қонысбай ШЕЖІМБАЙ, «EQ»
Тілсіз жау «әдеттегідей» Баянауыл ауданына қарасты Бірлік, Жаңажол, Май ауданына қарасты Саты, Ақшиман ауылдарындағы ағайынды састырды. Облыстық төтенше жағдайлар департаменті басшылығы ұсынған мәліметке сүйенсек, Жаңажол ауылына апаратын кіреберіс жолда судың деңгейі 25-30 сантиметрге дейін көтерілген. Бірлік ауылына кіреберіс жолдың бойында да су жиналып, Екібастұз қаласындағы №2 мамандандырылған өрт сөндіру бөлімі мамандары сусорғыш қондырғылар арқылы қауіптің бұлтын сейілтті. Ауылдағы кейбір үйлердің ауласы да суға толып, абырой болғанда ешқандай оқыс оқиға орын алмады. Сәтбаев ауылдық округі аумағындағы Ащысу өзені арнасымен аққан су Бірлік ауылына бағыт алғанын ескерсек, төтеншеліктер жағдайды қатаң бақылауда ұстағаны абзал. Бірлік ауылы тұсында салынған жаңа көпірге сеніп отыру дұрыс емес.
Павлодар облысы
