Украинадағы қарулы қақтығыс басталғалы бір айдан асты. Осыған дейін бірнеше кездесу өткізгенімен, тараптар ортақ келісімге келмеді. Екі мемлекет басшылары кездеспей, мәселе шешілмес деген де пікірлер айтылуда. Алайда Ресейдің сыртқы істер министрі С.Лавров президенттер – Владимир Путин мен Володимир Зеленскийдің кездесуі дәл қазір тиімді нәтиже бермейді деген пікір білдірді. Сербиялық БАҚ-қа пікір білдірген С.Лавров екі көшбасшы арасындағы кездесу тек екі тарап негізгі мәселелерге қатысты ортақ шешімге келе бастағанда ғана өтуі керек дейді. Ол алдағы уақытта өтуі мүмкін Украина мен Ресей арасындағы келіссөздердің жемісті болғанын қалайтынын жеткізді.
Жақында Ресей мен Түркия президенттері екі жақтың делегацияларының келесі кездесуін Ыстанбұлда өткізуге келіскені белгілі болды. Мемлекеттер басшылары телефон арқылы сөйлесіп, Ресей-Украина қақтығысын талқылаған. «Әңгіме барысында президент Р.Ердоған атысты тоқтату, сондай-ақ Ресей мен Украина арасында тез арада бейбітшілік орнату мен аймақтағы гуманитарлық жағдайды жақсарту қажеттілігін атап өтті», делінген Түркия президентінің әкімшілігі таратқан ақпаратта. Мәлімдемеде Түркия жағдайды реттеуге толығымен ықпал етуге дайын екені баса айтылған.
Ресей делегациясының басшысы Владимир Мединский кездесу 29-30 наурызда өтетінін хабарлаған.
Украина президенті Володимир Зеленский Ресеймен келіссөздердің келесі кезеңінде басымдық елдің егемендігі мен аумақтық тұтастығына берілетінін мәлімдеді. В.Зеленский Украинаның ядролық қарусыз және бейтараптық мәртебесін, қауіпсіздік кепілдіктерін талқылауға дайын деді. Алайда келісім сөз жүзінде емес, нақты бекітілген құжат болуы керек дейді Украина басшысы.
Украинада Мариуполь секілді қоршауда қалған қалалардың, шабуылдан қорғану үшін жертөлелерді паналаған тұрғындардың жағдайы қиын екені айтылуда. Алайда дүйсенбіде қоршалған қалалардан бейбіт тұрғындарды эвакуациялау үшін гуманитарлық дәліздер ашылмайтыны хабарланды. Украинаның вице-премьері Ирина Верещук бұл шешім дәліздердің қауіпсіздігін қамтамасыз ету мүмкін болмағандықтан қабылданғанын айтты. Ресей әскерінің шабуылы бейбіт тұрғындарды қоршауға алынған қалалардан эвакуациялауға кедергі келтіріп, бұл процесті хаосқа айналдырған. Мариуполь мэрі Вадим Бойченко қала гуманитарлық апаттың алдында тұрғанын және оны толығымен эвакуациялау керек екенін ескертті. Қалада 160 мыңға жуық бейбіт тұрғын электр жарығынсыз қалған.
Халықаралық Қызыл Крест комитеті де қоршауда қалған Мариупольге жете алмай жатқанын мәлімдеді. Ұйым мүшелері ол үшін Ресей мен Украина тарапы қауіпсіздікке кепілдік беруі керек дейді. Алайда бұл мүмкін болмай тұрғанға ұқсайды.
БҰҰ осы уақытқа дейін кем дегенде 1 100 бейбіт тұрғын қаза болды және 10 миллионнан астам адам көшірілді деген дерек жариялады. Украина Ресейді Мариуполь қаласынан мыңдаған бейбіт тұрғынды күштеп көшірді деп айыптап отыр. Ресей Мариупольдің шығысындағы Безымянныйдағы уақытша лагерьде 5 000-ға жуық адамды орналастырады деп хабарлады.
Ал Ресей Федерациясының қорғаныс басқармасы Ұлттық орталығының бастығы, генерал-полковник Михаил Мизинцев бір тәулік ішінде Украинадан Ресейге 19 694 бейбіт тұрғын эвакуацияланды деп хабарлады. Оның айтуынша, Ресей әуе күштері қауіпсіздік шараларын сақтай отырып күн сайын бейбіт тұрғындар мен шетелдік азаматтардың өмірін сақтаған. М.Мизинцев арнайы операция басталғаннан бері Ресейге 439 420 адам эвакуациялағанын, олардың 91 673-і балалар екенін, РФ мемлекеттік шекарасынан 51 638 жеке автокөлік өткенін айтты.
Украина мен Ресейдің таратқан ақпараттардағы алшақтықты осыған дейін айтқанбыз. Сондықтан бұл сандарды нақты растау мүмкін емес. Осыған дейін Беларусь аумағында, кейін онлайн өткен келіссөздер айтарлықтай нәтиже бермегені белгілі. Ендігі кезек – Түркия астанасында. Кезекті келіссөздің нәтижесі қандай болатынын уақыт көрсетеді.
