Қымбат Әбілдәқызы БАҚ-тың үш саласы: телевизияда – 2 жыл, Қазақ радиосында – 14 жыл, өзі ашқан Қазақстандағы ең алғашқы тәуелсіз балалар басылымы «Айгөлек» балалар журналында 18 жыл жас ұрпақтың болашағы үшін адал тер төгіп келеді. Қ.Әбілдәқызының әр тақырыпқа арнаған өлең, тақпақтары балалардың жүрегіне жылы, тіліне жеңіл, тез жатталады, патриоттық сезімін, рухын көтереді. Оған дәлел – республикалық деңгейдегі шығармашылық байқауларда бас бәйгелерді иеленуі. Оптимист, позитивті көзқарас иесі, қоғам қайраткері, майталман маман «Айгөлек» журналының оқырмандары – жас жеткіншектер құрметіне бөленуде.
Қазаққа жанашырлықпен, жанын сала еңбек жасайтындардың бірі – Қымбат Әбілдәқызының жыр жинағының тұсаукесеріне арналған іс-шараның мақсаты – оқырмандарды әдебиетті сүюге және өлең құдіретін бағалай білуге баулу, қазақ ақын-жазушыларының шығармаларын насихаттау, ақынның отбасылық өлеңдерін жастарға таныстыру арқылы дәстүрлі отбасы құндылықтарын дәріптеу, өрендердің өз бойындағы талантын ашуға, ғылыми ізденіске бейімделуге, тұлға болып қалыптасуына жол ашар тағылымды-танымдық орта қалыптастыру.
Ic-шараға ақын, жазушы, сатирик, Халықаралық «Алаш» әдеби сыйлығының иегері Көпен Әмірбек, Парламент Мәжілісінің депутаты Мақпал Мыса, алаштанушы ғалымдар, профессорлар Тұрсын Жұртбай, Айгүл Ісімақ, Еуразия ұлттық университетінің профессоры Серік Негимов, Қазақстанның еңбек сіңірген қайраткері Сейдахмет Құттықадам, ақын, жырау, Баянғали Әлімжан, қоғам қайраткері Сәдібек Түгел, т.б зиялы қауым өкілдері мен оқырмандар, кітапханашылар қатысып, Қымбат Әбілдәқызының шығармашылығы, жас жеткіншектерге жасап жатқан еңбегі, осы жолдағы табандылығы туралы пікірлерін айтты. Әлі сиясы да кеппеген жаңа кітаптың тұсауын кесті.
Кездесудің бір қызықты жері, батыс және басқа да өңірлерден «Айгөлек» журналын оқып өскен көптеген жас арнайы келіп қатысып, Қымбат Әбілдәқызына өздерінің жүрекжарды лебіздерін білдірді, сый-сияпаттарын жасады.
Кездесу барысында «Айгөлек» журналының бүгінгі оқырмандары – астаналық оқушылар өз өнерлерін көрсетіп, кездесудің шырайын келтірді.
