Қылмыс саны қысқарды

Биыл қаңтарда облыстық полиция департа­мен­тінің бастығы болып тағайындалған Василий Скляр жуықта тұрғындар алдын­да есеп берді. Ол былтыр атқарылған жұмыс­тар­ды жіпке тізді. Өткен жылы қоғамдық орындардағы қылмыс көрсеткіші 16 пайызға, көшелерде 25 пайызға дейін төмендепті. Өңірде жол-көлік оқиғаларының саны да бір­ша­ма азайған. Қала көшелерінде орнатыл­ған, көлік жүргізушілерінің «жауына» айналған «Интегра», «Автоураган», RedSpeed және «Оракул» жүйелері былтыр 51 мың заң бұзу­шы­лықты анықтаған.

«Полиция қызметі «сервистік модельге» көшуде. Аймағымызда бейнекамералармен жабдықталған 15 модульдік полиция пункт­тері салынды. Олар халыққа да, полиция қызметкерлеріне де ыңғайлы. Сондай-ақ Павлодар, Екібастұз, Ақсу қалаларында 4 стационарлық полиция бекеті орнатылды. Өткен жылдан бастап автопатрульдерде «Кибер-Шериф» борттық аппараттық-бағдар­ла­малық кешендері жұмыс істеуде. Олар жол қозғалысы ережелерін бұзушылықтарды автоматты режімде тіркеп, автокөліктер мен жүр­гізушілерді қолда бар ақпараттық базалар бо­йынша тексере алады. Осы жылдың үш айын­да аталған кешендер 3,5 мың құқық бұзу­шы­лықты анықтады», деді В.Скляр.

Ел Президенті Қасым-Жомарт Тоқаев Бас прокуратураға әйелдер мен балаларға қатысты зорлық-зомбылық үшін жазаны қатаңдату қажеттігі туралы тапсырма бер­ге­ні белгілі. Осы ретте, былтыр өңірде екі мыңнан астам тұрмыстық құқық бұзу­шы­лық тіркелген. Бүгінде полиция органдарында балаларды тәрбиелеуден жалтарған 318 ата-ана тіркеулі. Олармен күнделікті профилактикалық жұмыстар жүргізіледі. Кәме­летке толмағандарды тәрбиелеу жөнін­де­гі міндеттерді орындамағаны үшін 546 ата-ана, кәмелетке толмағандардың түнгі уа­қытта ойын-сауық мекемелерінде және тұр­ғын­жай­дан тыс жерде болғаны үшін 3 мыңға жуық ата-ана әкімшілік жауапкершілікке тартылыпты. Мұндай жұмыстың нәтижелері кәмелетке толмағандарға қатысты жасалған қылмыстар санының 33 пайызға төмендеуіне әсер еткен.

Облыс аумағында ауыр және аса ауыр қылмыстарды ашу 81 пайызды құрап отыр. Өңірде қашықтан сатып алу және он­лайн-қызметтерді ұсынумен байланысты қыл­мыстарды ашумен айналысатын арнайы топ құрылған. Олар ел аумағында 600-ге жуық алаяқтық жасаған 6 топты ұстады. 2020-2021 жылдары автокөліктерді интернет арқылы жалған сатудың шамамен 117 фактісі анық­талған. Интернет арқылы алаяқтықпен айналысатын азаматтардың қылмысын алдын алу мақсатында «Киберқадағалау» бағ­дар­ламасы жүзеге асуда. Бұл жоба аясында заңға қайшы контентті қамтитын 325 сілтеме бұғатталды. Сондай-ақ 49 есірткі қылмысы анық­талды. Заңсыз айналымнан 384 келі есірткі құралдары жойылған.

«Өткен жылдың қыркүйек айында 18 ұрлық жасаған 14 мал ұрысынан тұратын қыл­мыстық топ құрықталды. Мал ұрлығының барлығы дерлік жайылымдарда жасалады. Қараусыз, бос жүрген мал заң бұзушылыққа себеп болып табылады. Сондықтан қараусыз малға арнайы құрылған 146 айыппұл тұрағына автожолдар бойында жайылып жүрген 17 мыңға жуық үй жануарлары қамалды. Мал жаю ережелерін бұзғаны үшін 2000 азамат әкімшілік жауапкершілікке тартылды. Мал иелеріне 45 млн теңгеге 250 бас мал қайта­рылды. Бұл шаралардың орындалуы облыс­та­ғы мал ұрлау фактілерін айтарлықтай азайтуға мүмкіндік береді», деді Василий Скляр.

Айтпақшы, жақында павлодардық полицейлерге жаңа форма үлестірілді. Тәртіп сақ­шы­­лары жаңарған форма барынша ыңғай­лы екенін, сондай-ақ оны дайындау барысында әртүрлі климаттық жағдай ескерілгенін атап өтті. Жаңа форманы ең алдымен патрульдік полиция жасағы мен инспекторлар алды. Екі жыл ішінде барлық полицейге жаңа форманы кигізу жоспарланып отыр.

Павлодар облысы