Деніңіз сау болсын!

Күн сайын қоғамда атқарылып жатқан жұмыстар жөнінде бұқаралық ақпарат құралдары арқылы танысып, біліп жатамыз. Денсаулық сақтау саласы да бұдан тыс қалмайды. Атап айтқанда, медицинада көп өзгерістер болды. Алдағы істелетіні де қыруар. Халыққа көрсетілетін көмектің қауіпсіздігі мен қолжетімділігіне, сапаның жақсаруына күш-жігер жұмылдырылуда.

 

Бұл ретте Денсаулық сақтау министрлігі мен тиісті органдар «Саламатты Қазақстан» бағдарламасын іске асыру үшін аянбай еңбек етуде. Ал дәрігерлік көмектің сапасын жақсарту, бәсекеге қабілетті денсаулық сақтауды қалыптастыру үшін медициналық ұйымдарды сыртқы кешенді бағалау (аккредиттеу) жалғаса бермек. Бағдарламада медициналық ұйымдарды аккредиттеу ұлттық стандарттар негізінде, ал кейіннен халықаралық стандарттар негізінде жүзеге асырылатын болады деп нақтыланған. Енді, осы мәселеге тоқталып өтейік. Аккредиттеу дегеніміз не? Одан емделушілерге келер пайда қандай? «Аккредиттеу» сөзі – латын тілінен аударғанда «сенім білдіремін» деген мағынаны білдіреді. Ол медициналық ғылым мен технологияның қазіргі заманғы дамуы негізінде белгіленген стандарттарға сәйкестігін бағалау үшін қолданылады. Аккредиттеу – еріктілік, тәуелсіздік, әділдік, жариялылық және айқындық қағидаттарына негізделген, әрі бәсекеге қабілетті денсаулық сақтауды қалыптастыру, медициналық көмектің сапасын жақсарту үшін жүргізіледі. Сондықтан аккредиттеуден өтуге ниеттенген медициналық ұйымдар жан-жақты бағалаудан өтуі тиіс. Ол кезде жалпы басқару, дәрілік қауіпсіздік, өрт қауіпсіздігі, науқастың қауіпсіздігі, қаржыны басқару, еңбек шараларының жүргізілу барысы, ішкі аудит, ресурстарды басқару, еңбек гигиенасы және т.б. параметрлерге жіті назар аударылады. Бұл медициналық қызмет сапасын арттыруға, техникаларды заман талабына сәйкестендіруге, медицина саласын жетілдіруге септігін тигізеді. Осындай бағалаудан өткеннен кейін ғана аурухана қойылатын талаптарға сәйкес келе ме, жоқ па деп нық айтуға болады. Сайып келгенде, әрине сыртқы кешенді бағалаудан өткен медициналық ұйымдарға өз денсаулығымызды сеніп тапсыруымызға болады. Дүниежүзілік тәжірибеде аккредиттеу стандарттары бойынша бағалаудан өткен және «ISQua денсаулық сақтаудағы сапа бойынша Халықаралық қауымдастықпен» танылған медициналық мекемелерге халық ерекше сенім артады. Сондықтан, егер сіз медициналық көмек алу үшін қай емханаға баратыныңызды білмесеңіз, сапа стандарттарына сай келетін клиникаға жүгінгеніңіз жөн. Ол тізімді сіз Денсаулық сақтау министрлігі мен Республикалық денсаулық сақтауды дамыту орталығының ресми сайтынан ала аласыз. Яғни, аккредиттелген клиникаларда емделушілердің құқықтары сақталады, медициналық көмек тиісті деңгейде көрсетіледі деп нақты айтуға болады. Деніңіз сау болсын! Расул ҚАСЫМБЕКОВ, «Республикалық денсаулық сақтауды дамыту орталығы» РМК Аккредиттеу орталығының бас маманы.