Ғасырға жуық ғұмырында қазақ елінің басына келген нәубеттердің бәрінен аман өткен абыз қарияның ұрпаққа айтар өнегелі әңгімесі мол. Бұл ретте жасы 97-ге келген өзін қоршай отырғандар алты-тоғыз жасар балдырғандармен сөйлесіп, ақыл-кеңесін айтты.
Көпшілік назарына аталған клубтың тәлімгері Гүлзия Ауқашова ғылым ғана емес, соғыс және еңбек ардагерінің қайталанбас ғұмырнамасын тәрбиеленушілерге баяндап берді.
«Біздің халқымыз – әлемдегі ең өміршең, ойшыл да озық халық. Олардың бүкіл дүниетанымы, салты, дәстүрі, ұстанымы, тыныс-тіршілігі – философия. Сендердің осындай клубта өздеріңнің әжелеріңдей ұстаз-тәлімгерлерден тәлім алып жатқандарыңның өзі ұлттық сананың, ұлттық философияның жемісі», деді абыз.
Өз кезегінде балдырғандар да жамырай сұрақтарын қойды. Бұған тұшымды жауап алған оқушылар дән риза. Сондай-ақ олар ұстаздарына қосылып ән шырқап, күй шертті.
Кездесу соңында клуб тәрбиеленушілері өздерінің болашақта кім болатыны, қандай мамандықты, кәсіпті қалайтынын кезек-кезек орындарынан тұрып атап шықты да, ақсақалдан бата сұрады.
Қызыр сипатты қонағымыз айтқандай, енді бір жиырма жылдан кейін ел мен жердің бір-бір тұлғасы болатын балдырғандардың жүзі бал-бұл жанып, естелік суретке түсткеннен кейін, ғасыр атасын шығарып салды.
Гүлнар Кенжеғұлқызы,
Алматы қалалық «Шыңға өрлеу» әлеуметтік клубының Жетісу бөлімінің меңгерушісі
