Қаржы • 24 Мамыр, 2022

Ақша-несие саясаты қатаңдауы керек пе?

Қазақстан Қаржыгерлер қауымдастығы аналитикалық орталығы қаржы нарығы кәсіби қатысушылары арасында жүргізілген кезекті сауалдамасының қорытындысын жариялады. Сауалдама аясында монетарлық саясат қатаңдауы қажет пе деген сауалға да жауап айтылды.

Абай ҚАЗБЕКҰЛЫ

«Мұнайдың жоғары бағасы, ұлттық валюта курсын тұрақтандыруға арналған қадағалау шаралары фонында, сондай-ақ алда келе жатқан (20-25 мамыр) салық кезеңі қарсаңында сарапшылардың ұлттық валюта курсына байланысты күтулері біршама жақсарды. Сауалдама қатысушылары биылғы маусым айының басында теңге-доллар курсы 448,3 теңгені құрайды деп болжайды. Ал бір ай бұрын 472,9 теңге деп күтілген. Төл валюта курсына қатысты бір жылдан кейінгі күтілім негативті – 484,0 теңге (+8,7 пайыз) межесінде деп болжанады. Әлі де болса сақталып отырған геосаяси қысым, әлемдік нарықтағы құбылмалылық, дамыған елдердің ақша-несие саясатын қатаңдатуы аясында инвесторлардың дамушы елдердегі активтерден кете бастауы алдағы 12 айда теңгеге қысым көрсетуі мүмкін», дейді сарапшылар.

Аналитиктер бір жылдан соң да мұнай бағасы қазіргі деңгейінде – барреліне 104,4 доллар болады деп болжайды. Ұсыныс пен сұраныс тепе-теңдігінің орнықсыздығы, нарықтағы құбылмалылық қара алтын бағасын жоғары күйінде ұстап тұрмақ. Елдегі инфляциялық қысымның күшеюі аясында (сәуірде 13,2 пайыз) және әлемдік экономикадағы проинфляциялық қысым жағдайында инфляция бойынша орташа бағалау 11,7 пайыз деңгейінде (бір жыл бұрын 9,4 пайыз болған) тоқтайды.

«Кезекті рет базалық ставканы 14,0 пайызға дейін көтергеннен кейін көптеген сарапшы (69 пайызы) ақша-несие саясаты қазіргідей сақталады деп есептейді. Бұл ретте сарапшылардың 25 пайызы базалық ставка 14,5-15 пайызға дейін жоғарылайды деп күтеді», делінеді сараптамада.

Сарапшылардың Қазақстан ІЖӨ-нің өсімі бойынша күтулері 3,0 пайызға дейін төмендеген. Жаһандағы логистикалық тізбектердің әлі қалыпқа келмей тұрғандығы, сонымен қатар әлемдік экономиканың баяулауы біздің де ішкі жалпы өніміміздің төмендеуіне әсерін тигізбек.

Күннің маңызды және өзекті жаңалықтарын «Егемен Қазақстан» телеграм каналынан оқыңыз