Депутаттар сессияның хатшылығын, есеп комиссиясын, редакциялық алқасын бірауыздан сайлағаннан кейін, Ұлытау облыстық мәслихатының хатшысы лауазымына ұсынылған депутат Бауыржан Шыңғысовтың кандидатурасын талқыға салды. Дауыс беру нәтижесінде, депутат Бауыржан Шыңғысов бірауыздан Ұлытау облыстық мәслихатының хатшысы болып сайланды.
Жезқазғанның тумасы болып саналатын жаңа хатшының мемлекеттік қызметте жинақтаған тәжірибесі өте мол. Ол 2006 жылы «Қазақмыс Корпорациясы» ЖШС-де экономикалық қауіпсіздік департаментінің директоры болып жүріп, мемлекеттік қызметке ауысқан. Жезқазған қаласы әкімінің орынбасары, Сәтбаев және Жезқазған қалаларының әкімі қызметтерін атқарды.
Одан кейін Ұлытау облыстық мәслихатының комиссиялары құрылып, олардың құрамы мен төрағасы сайланды. Атап айтқанда, депутат Ерболат Сатыбалдин бюджет және қаржы жөніндегі тұрақты комиссияға, депутат Бекзат Алтынбеков әлеуметтік мәселелер жөніндегі тұрақты комиссияға, ал Силар Қияқбаев өнеркәсіп, кәсіпкерлік, аграрлық және тұрғын үй-коммуналдық мәселелер жөніндегі тұрақты комиссияға жетекшілік ететін болады.
Сондай-ақ, сессияда «Ұлытау облыстық мәслихатының аппараты» ММ құрылып, облыстық мәслихат аппаратының құрылымы және облыстық мәслихаттың регламенті бекітілді.
Ұлытау облысы
