Мазмұнды іс-шараға Мәдениет және спорт министрі Дәурен Абаев, ғалымдар, At-trаvel клубының өкілдері мен қоғам белсенділері қатысып, экспедиция мүшелеріне сәт-сапар тіледі.
– Осы далада адамзат алғаш рет жылқыны қолға үйретті. Ботай мәдениеті – сол ұлы өркениеттің бастауы. Бозоқ қалашығы – еңселі елордамыздың алтын тамыры. Бұл жерде ұлттық парк құру арқылы біз көне тарихымызды жас ұрпаққа насихаттаймыз. Мәдениет және спорт министрлігі ашық аспан астындағы ұлттық музей құрылысын кезең-кезеңмен жүзеге асыруды көздейді. Алдағы уақытта да «Бозоқ» музей-қорығының жұмысы жандана береді. Солтүстік Қазақстан мен Ақмола облыстарының арасын атпен жүріп өтетін экспедицияның мәні ерекше. Осындай іс-шаралар арқылы атқа мінуді насихаттаймыз, тарихымызбен танысамыз, эко-туризмді дамытамыз. Экспедицияны ұйымдастыруға үлес қосқан баршаңызға алғыс айтамын, – деді Дәурен Абаев.
Айта кетейік, Бозоқ – астана іргесінде орналасқан 1250 жылдық тарихы бар көне қалашық болса, Ботай – ертедегі Еуразия жылқы өсірушілерінің бірегей қонысы. Бұл мәдениет біздің заманымызға дейінгі V-IV ғасырларда дәуірледі. Онда жүргізілген зерттеулердің тарихи маңызы – жылқыларды қолға үйретудің әлемдегі бірден бір орталығы Қазақстан екенін дәлелдейді.
