Мысалы, осы мақсатқа деп облыстық бюджеттен 1 млрд теңге қарастырылған. Бұл игі істен шет қалмаған «Отбасы банк» те ортаға 500 млн теңге қаржы салып отыр. Яғни жеңілдікті қарыз 20 миллион теңгеге дейінгі сомаға
5%-бен беріледі. Бастапқы жарна 19 жылға дейінгі мерзіммен қарыз сомасының 10%-ын құрайды. Ал тұрғын үйді бастапқы және қайталама нарықта сатып алуға болады.
Еске сала кететін бір жайт, бұл қолжетімді ипотекалық жаңа бағдарлама жас мұғалімдерге, дәрігерлерге, медбикелерге, спортшыларға, жаттықтырушы-оқытушыларға, мәдениет қызметкерлеріне, журналистерге, жоғары оқу орнының оқытушыларына, ғылыми қызметкерлерге және әлеуметтік сала өкілдеріне арналған.
Бағдарламаның өзіндік шарттары да бар. Мысалы, ипотека кемінде бір жыл ресми жұмыс істеген 35 жастан аспаған қарағандылықтарға беріледі. Бұл жерде табыс та ескеріледі. Отбасының әрбір мүшесіне ол алты ең төменгі күн көру деңгейі (1 ЕТККД – 37 389 теңге) мөлшерінен аспауы, сондай-ақ бағдарламаға қатысушы мен отбасы мүшелерінің кейінгі бес жыл ішінде меншігінде жылжымайтын мүлік болмауға тиіс.
Облыстық жастар саясаты басқармасының басшысы Біржан Әлімжанов ипотека бағдарламасына қатысушыларды құрамына мемлекеттік органдар, депутаттық корпус және қоғам өкілдері кірген комиссияның іріктейтінін айтады.
– Бағдарламаның механизмі өте қарапайым. Бірінші кезекте әлеуетті қатысушылар қалалық әкімдіктің фронт-кеңсесіне жүгініп, тиісті құжаттар тізбесін тапсыруы керек. Одан кейін комиссия балдық жүйе негізінде банкте біліктіліктен өтуге жолдама берілетін қатысушылардың тізімін жасайды. Мұнда өтініш берушінің несие тарихы, төлем қабілеттілігі деңгейі жан-жақты зерттеледі. Банк тарапынан оң шешім қабылданған жағдайда қарыз алушы ресімдеу процесіне көшеді. Іріктеу кезіндегі негізгі өлшемшарттар – еңбек өтілі, балалар саны және әлеуметтік осал санаттарға кіру, – деп егжей-тегжейлі түсінік берді Б.Әлімжанов.
Баспаналы болсам деп жүрген үйсіз жастар өтінімді 24 маусымға дейін тапсыра алады.
Қарағанды облысы
