Суретті түсірген Ерлан ОМАР, «EQ»
Ең әуелі Ақпараттық технологиялар колледжінде жергілікті кәсіпорындардың басшылары және колледж директорларының қатысуымен «Өндіріске арналған кадрлар. Ұсыныс пен сұраныс» атты дөңгелек үстел ұйымдастырылды.
Жиында облыс әкімі Әбілқайыр Сқақов өңірдегі еңбек нарығына қажетті мамандарды даярлау бойынша жүргізіліп жатқан жұмыс туралы айтып берді. Соңғы екі жыл ішінде техникалық және кәсіби білім беру жүйесін қаржыландыру 25 млн теңгеден 0,5 млрд теңгеге дейін өскен. «Дуалды оқыту бойынша қолдау көрсететін ірі кәсіпорындардың демеушілік көмегі де аса маңызды. Біз бұл жұмысқа орта және шағын бизнес өкілдерін де тартып отырмыз», деді Ә.Сқақов.
А.Аймағамбетов Павлодар облысында өндіріс жақсы дамығанын, көптеген ірі кәсіпорын тіркелгенін айта келе, кәсіби білім беру бағытындағы жұмысты жандандыруды еске салды.
– Бүгінде колледж басшылары жұмыс берушілермен бірлесіп, білім беру бағдарламаларының мазмұнын дербес айқындауға кірісті. Бұл шаралар өндірістегі технологиялық өзгерістерге және еңбек нарығының сұраныстарына бейімделуге мүмкіндік береді. Сәйкесінше, техникалық және кәсіптік білім беру жүйесі жұмыс берушілердің талаптарына сай келетін мамандарды даярлайтын болады, – деді А.Аймағамбетов.
Бұдан кейін Ақпараттық технологиялар колледжінің директоры Серік Жартыбаев білім ордасындағы жаңғыртылған оқу кабинеттері, 3-D модельдеу, робот және электр техникасы, желілік әкімшілеу, графикалық және веб-дизайн зертханаларының ашылуы туралы айтып берді.
– Колледжде ашылған бизнес-инкубаторда жүзден аса табысты стартап жобалар құрастырылды. Біз Мicrosoft және Festo сияқты халықаралық компаниялармен, Іt-hub академиясымен және Сколково ғылым және технологиялар институтымен әріптестік орнаттық, – деді С.Жартыбаев.
Облыс әкімдігінің қолдауымен ІТ-колледж базасында өңірлік «Tandau» онлайн-платформасы құрылғанын атап өткен жөн. Он төрт жасқа толған кез келген тұрғын платформада тіркеліп, өзінің біліктілігіне қарай жұмыс таба алады. Жұмыс берушілер жаңа жүйенің көмегімен өздеріне қажетті қызметкерлерге тапсырыс беріп, жұмыскерлерді қайта даярлауға өтініш қалдырады.
Айтпақшы, ІТ білім беру жүйесін дамыту Торайғыров университетінде де қолға алынған. Ондағы ІТ-мектепке кез келген адам жазылып, қысқа мерзімді бағдарламалау курстарынан өте алады. Сондай-ақ университетте білікті IT-мамандарды даярлауды мақсат еткен Computer Science факультеті ашылған. «Мемлекет басшысы Қазақстан халқына Жолдауында жүз мыңнан кем емес ІТ-маманды даярлау туралы тапсырма берген еді. Жақын арада өңірде осы салада сұранысқа ие
5 мың маман әзірлеу жоспарда бар», деді облыс әкімі Ә.Сқақов.
Павлодар облысы
