Ол Президент жанындағы Әйелдер істері және отбасылық-демографиялық саясат жөніндегі Ұлттық комиссияның кезекті отырысында ұлттың тұтас психологиясын, философиясын, этикасы мен мәдениетін, педагогикасын қалыптастырған ұлы тұлғаларымыздың көзқарасы негізінде «Мектепке дейінгі және бастауыш мектеп мекемелеріндегі тәрбие тұжырымдамасын» жасауды ұсынды.
«Өйткені ақпараттық технологиялардың тасқыны рухани құндылықтарды тықсырып барады. Әлеуметтік желіде балдырғандарға көрсетіп жатқан зорлық-зомбылық туралы видеолардан, жарияланымдардан көз сүрінеді. Ұлттық тәрбие көзі рухани құндылық ретінде бағаланбай, жойылып бара ма деген алаңдаушылық бар», деді комиссия мүшесі өз сөзінде.
Сондай-ақ ол әлеуметтік желідегі түсініктер текетіресі нәтижесінде «ұятмэн» деген жаңа ұғым пайда болғанын да айтты.
«Ұят. Обал. Сауап. Бізді ұлт ретінде сақтаушы ата-бабадан келе жатқан осы үш қағида еді. Бүгін әлеуметтік желідегі түсініктер текетіресі нәтижесінде «ұятмэн» деген жаңа ұғым пайда болды. Сондықтан мектеп оқушыларына медиасауаттылық пен цифрлық сауаттылықты үйрету заман талабына айналып отыр», деп атап өтті ол.
