100 балаға кабинет жетіспейді
Борас орта мектеп-бақшасының қалыптасу тарихы қысқаша алғанда осылай. Аудандық білім бөлімінің басшысы Самат Омарғазиннің айтуынша, қазір мұнда бірінші қабатта 135 бала 6 топқа бөлініп, мектепке дейінгі біліммен қамтылып келеді. Екінші қабатында 400-ге жуық оқушы екі ауысымда білім алып жүр.
«Алдағы оқу жылына 404 бала келіп, екі ауысымда оқиды деп күтіліп отыр. Мұнда сабақ оқуға арналған 11 кабинет қана бар. Демек 100 балаға кабинет жетіспейтінін байқауға болады. Шығыс Қазақстан облысының қарамағында болған кезімізде өңір басшысынан осы мәселені шешіп беруді сұрағанбыз. Осы мектеп 2023 жылдың тізіміне кіргізілген болатын. Даниал Ахметов өңірге келген кезде биыл жобалық-сметалық құжаты дайын болады деп айтқан еді. Алайда жаңа облыс құрылған соң, бұл процедурадан қайта өтуімізге тура келеді. Сондықтан Абай облысының әкімі Нұрлан Ұранхаев бұл мәселенің шешілуіне септеседі деген үміттеміз. Неге десеңіз, бұл – бірінші кезекте балабақша. Орта білім берудің талаптарына сәйкес келмейді. Екіншіден, бұл ғимаратқа күрделі жөндеу жүргізу қажет. Ұзақ жылдан бері мектеп-бақшаны жөндеуге қаражат бөлінбей келеді», деді С.Омарғазин.
Жаңа балабақша қирап жатыр
Аудан орталығындағы «Айналайын» балабақшасының ашылғанына 8 жыл ғана болған. Әйтсе де «Айналайынды» айналып өтсеңіз оның қабырғаларының жарықшақтан көрінбейтінін байқауға болады. Апатты деп танылған балабақша 2014 жылы шамамен 225 млн теңгеге салынған-ды. Мұнда 90 бала 4 топқа бөлініп, мектепке дейінгі біліммен қамтылуға тиіс еді. Десе де көктем сайын аудан халқын мазалайтын жерасты сулары салдарынан білім беру ғимараты бүліне бастаған.
«Жерасты сулары көтеріліп, өкінішке қарай, балабақшаның едені бүлініп кетті. Осыған байланысты «Алтай Сәулет» компаниясы тиісті сараптаманы жасап берді. Жобалық-сметалық құжат дайындалып, жөндеу жұмыстарына шамамен 72 млн теңге бөлінуге тиіс болатын. Былтыр облыс орталығында құрылысқа қажетті қаражатты қорғап шыққан едік. Биыл көктемде жөндеу жұмыстары басталуы керек еді. Бірақ жаңа әкімшілік аумаққа бөлінгендіктен бұл қаражатты Шығыс Қазақстан облысының әкімдігі өздерінде қалдырды. Бұл жағдайдың салдарынан 90 бала үйлерінде отыруға мәжбүр», деді аудандық білім бөлімінің басшысы.
Башкөлде 10-11 сынып жабыла ма?
Бұдан басқа бесқарағайлықтар Башкөлдегі орта мектепте 10-11 сыныптың жабылатынына алаңдаулы. Ата-аналар бұл туралы оқу жылына жарты ай қалғанда ғана хабарландырылғанына наразы. Абай облысы білім басқармасының басшысы Нұржан Ахметқалиев айтқандай, бұл мәселені реттеудің жолдары бар.
«Қазір білім бөлімінің өкілдері оқушыларды мектеп-интернатқа орналастыруды ұсынды. Мектеп шағын болғандықтан, 10-11 сыныптарды жабу туралы шешім қабылданды. Оқу-ағарту министрлігінің талабына сәйкес оқушылардың контингенті 81%-дан төмен болмауы қажет. Ал аталған мектепте оның көрсеткіші – 65%. Ауданда тексеру комиссиясы болып, осындай ұйғарымға келген», деді Н.Ахметқалиев.
Десек те бұл ұсынысты барлық ата-ана жылы қабылдады деп айту қиын. Сол себепті оқушыларды ауданда қызмет етіп тұрған негізгі мектептерге тасымалдау мүмкіндіктері де пысықталып жатыр.
Балабақшаның ғимараты қайтарылады
Аудандағы білім беру саласындағы ахуалмен танысқан облыс әкімі Нұрлан Ұранхаев барлық өзекті мәселені жүйелі түрде шешуге күш салынатынын жеткізді.
«Жыланды ауылында оффтейк келісімшарты негізінде мектеп салынып жатыр. Биыл тапсырылады деп көзделіп отыр. Бесқарағайдағы мектеп-бақшаның қызметімен танысып шықтым. Сондай-ақ апатты балабақшаның жағдайына қанықтық. Қазір күрделі жөндеу жұмыстарына жобалық-сметалық құжаты дайындалып жатыр. Бұл биыл жөнделетін болады. Жоспарда 300 орындық мектептің құрылысы тұр. Оны 600 орынға ауыстырамыз. Сөйтіп балабақшада қаңтарылып отырған оқушылар талапқа сәйкес мектепте білім алады. Ал балабақшаның ғимараты өздеріне қалады», деді Н.Ұранхаев.
Биыл аудан бойынша 1-сыныптың табалдырығын 264 бала аттайды деп жоспарланып отыр. Тұтастай алғанда, биылғы оқу жылындағы оқушылардың саны 3 мыңға жетуге тиіс.
Абай облысы,
Бесқарағай ауданы
