«Мемлекет басшысы Қасым-Жомарт Тоқаевтың тапсырмасымен елімізде «Жайлы мектеп» ұлттық жобасын жүзеге асырылып жатқаны белгілі. Бүгінде елімізде мектептегі оқушы орнының тапшылығы 200 мыңнан асады. Болжам бойынша 2025 жылға қарай жалпы қажеттілік 1 млн орынға жетеді. Ұлттық жоба аясында кемінде 800 мың оқушы орны ашылады. Бұл оқушы орнының тапшылығын, үш ауысымда оқитын және апатты мектептердің мәселесін толығымен шешеді. «Жайлы мектеп» жобасы аясында мектептерді салу мен жабдықтаудың бірыңғай стандарты қолға алынады. Жоба аясында ашылған мектептер заманауи пән кабинеттерімен, зертханалармен толық қамтамасыз етіледі. Жаңа мектептерде оқу бағдарламасына сәйкес оқу алаңдары кеңейтіледі. Оқу зертханалары, роботтехника кабинеттері, спорт залдары, әмбебап шеберханалар мен студиялар болады. Бастауыш және жоғары сыныптар үшін де бөлек блоктар қарастырылған. Сондай-ақ олар жеке спорт залдарымен, асхана және оқу кабинеттерімен қамтамасыз етіледі. Президент Жолдауда жоғары сыныптарда жаратылыстану-математика бағытындағы пәндер мен ағылшын тіліне басымдық беруді тапсырды. Математика, физика, химия, биология пәндерінің сағаттарын көбейту жоспарланып отыр. Сондай-ақ оқу бағдарламалары да жаңартылады. Мұғалімдерге қосымша курстар ұйымдастырылады. STEM білім беру тәсілдеріне негізделген жаратылыстану-математика пәндерін оқытуды күшейту жоспарланып отыр. Сонымен қатар жоғары сыныптарда ағылшын тілін үйренуге, нақтырақ айтқанда, 10-11 сыныптардағы ағылшын тілі сағатын көбейтуге, бағдарламаларды жаңартуға және мұғалімдердің біліктілігін арттыруға баса мән беріледі. 2024 жылдан бастап CEFR бойынша 3-сыныпта ағылшын тілін оқыту сағаттарын ұлғайту мен қазақ және орыс тілдерін меңгеру үшін қажетті оқу жүктемесін қамтамасыз ету шаралары қабылданады», деді А.Аймағамбетов.
Мемлекет басшысы Қазақстан халқына Жолдауында тәрбиешілердің әлеуметтік мәртебесін көтеру, жалақысын көбейту, сондай-ақ олардың жұмыс жүктемесін азайту бойынша шаралар қабылдауды тапсырған болатын. Оқу-ағарту министрі аталған мәселеге де тоқталып өтті.
«Бүгінгі таңда балабақшаларда бір педагогке 25 баладан келеді. Бір мұғалімге жүктелетін жүктеменің көптігінен әр балаға көбірек көңіл бөлу мүмкіндігі шектеулі. Мемлекет басшысының тапсырмасы аясында мектепке дейінгі ұйымдардың педагогтерін аттестаттау жүйесі жаңартылып, олардың жалақысы көтеріледі, сондай-ақ тәрбиешілердің жүктемесі азайтылады. Бұл мектепке дейінгі тәрбиешілерге балаларға көбірек көңіл бөлуге және дамыту мен оқыту іс-шараларының тиімділігін арттыруға көбірек мүмкіндік береді. Қазір бірнеше балабақшада қанатқақты жоба жүргізіліп жатыр. Оның аясында тәрбиешілерге еңбекақы төлеу жүйесі сынақтан өтіп жатыр, сонымен қатар пилоттық жобаның қорытындысы бойынша мектепке дейінгі ұйым педагогтерінің еңбекақысын арттыру бойынша есеп ұсынылады. Нормативтік құқықтық актілерге де өзгерістер енгізіледі. Бұл шаралар балабақшаларға білікті кадрларды тартуға, мектепке дейінгі тәрбие мен оқытудың сапасын арттыруға мүмкіндік береді», деді ол.
Жиын барысында министр 2 жастан 6 жасқа дейінгі балаларды мектепке дейінгі сапалы біліммен қамтамасыз ету шаралары қолға алынатынын алға тартты.
«Бүгінде кезекте тұрған балаларды есептейтін болсақ, 2-6 жас аралығындағы балаларды қамту 88%-ды, ал жалпы балалар санының 57,7%-ын құрап отыр. Қамтуды одан әрі ұлғайту үшін жергілікті бюджеттен құрылыс салу жолымен мектепке дейінгі ұйымдарды іске қосу бойынша жергілікті атқарушы органдармен жұмыс жалғасады. Сондай-ақ МЖӘ аясында мектепке дейінгі ұйымдар желісі және жекеменшік мектепке дейінгі ұйымдарда мемлекеттік тапсырыстарды орналастыру кеңейді. Бүгінгі таңда Оқу-ағарту министрлігі жергілікті атқарушы органдармен бірлесіп, мектепке дейінгі ұйымдарды пайдалануға беру және ашу жоспарын жүзеге асырып жатыр. Мектепке дейінгі ұйымдардың қызмет көрсету сапасын арттыру үшін мектепке дейінгі ұйымдарда мемлекеттік тапсырыстарды орналастыруға қойылатын талаптар күшейтілді. Мемлекеттік тапсырысты орналастыру жан басына шаққандағы форматқа және балалардың балабақшаға бару кезіндегі төлемді бақылау тетігіне өзгертілді», деді министр.
Оқу-ағарту министрі Асхат Аймағамбетов педагог кадрларды даярлау сапасын арттыру маңызды мәселелер қатарында екенін атап өтті.
«Мұғалімдерді даярлау бөлігінде педагогикалық және басқа да жоғары оқу орындарын аккредиттеу стандартын әзірлеу бойынша жұмыстар жүргізіліп жатыр. Бұл педагог кадрларды даярлау сапасын арттыру үшін қажет. Қазіргі уақытта ЖОО-ларды аккредиттеу жалпы критерийлер бойынша жүргізіледі. Педагогикалық жоғары оқу орындарын аккредиттеудің әзірленген стандартын болашақ оқытушылар даярланатын ЖОО-ның білім беру бағдарламаларын аккредиттеу барысында тәуелсіз аккредиттеу агенттіктері пайдаланады деп жоспарланып отыр. Сондай-ақ Оқу-ағарту министрлігі «Педагог» кәсіби стандартын қабылдау бойынша жұмыстарды аяқтауға жақын. Осы кәсіби стандартты ескере отырып, білім беру бағдарламалары, педагогтерді сертификаттау және аттестаттау рәсімдері, үздіксіз кәсіптік даму мазмұны әзірленіп, жаңартылады, педагог кадрларды қызмет бабында жоғарылату стратегиясы құрылады. Кәсіби стандарт бекітілгенге дейін педагогтермен және басқа да мүдделі тараптармен кең талқылаулар жүргізіледі. Нәтижесінде «Педагог» кәсіби стандарты білім берудің барлық деңгейіндегі педагогтердің кәсіби даму траекториясының бірыңғай бағдарына айналады», деді А.Аймағамбетов.
