Жастар мұндай экологиялық іс-шаралар арқылы қала көшелері, демалыс орындары, көпқабатты үйлердің аулаларын қоқыстан тазартып, өскелең ұрпақтың санасында азаматтық парыз ұғымын қалыптастыруға, парасаттылық пен жоғары мәдениеттіліктің дәнін себуге жол ашатынын айтады. Жоғары оқу орындарының студенттерін табиғатты сүюге шақырған «Эко-плогингке» қатысушы Қожа Ахмет Ясауи атындағы ХҚТУ-дың 1-курс студенті Мадина Өндірбай соңғы жылдары әлемде экологиялық мәселелер көбейіп, жаһандық жылулық пен пластикалық заттарды адамдар көптеп қолдана бастағанына алаңдаулы.
«Біз зиянды заттарды азырақ пайдаланып, қоршаған ортаны таза ұстауға ұмтылуымыз керек. Университетіміздің мақтанышына айналған Ботаникалық бақ тек оқу орнының емес, Түркістан қаласының да «жасыл өкпесі» дей аламыз. Бұл бастаманың мақсаты – жұрт назарын еліміздегі экология мәселесіне аудару. Соның ішінде, әсіресе жастардың бойында туған жердің табиғатына деген жанашырлық сезімін оятып, оны нақты іспен дәлелдеу. Осы челлендж арқылы студенттер қаланың тазалығына көңіл бөлуге, айналаны күтіп ұстауға, қоқысты жәшікке сұрыптап салуға дағдыланады. Студенттермен бірге қаншама қоқыс жинадық, енді арнайы хэштегпен инстаграмға жүктеймін деп отырмын», дейді студент.
Ал Түркістан облыстық Жастар ресурстық орталығының баспасөз хатшысы Таңшолпан Біләлдің айтуынша, түркістандық жастар қоршаған ортаны таза ұстауға арналған челленджді Павлодар қаласынан қабылдап алып, енді Тараз қаласына жолдайды.
«Жалпы, баршамыз өзіміз тұратын қаланы ұқыпты ұстап әрі таза ауа жұту үшін айналамызға қоқыс тастамай жүруіміз керек. Қоршаған ортаға деген көзқарасымызды өзгертсек қана Табиғат-Ана да бізге алғысын білдіреді», дейді Таңшолпан Біләл.
Бүгінде декоративті және жеміс өсімдіктерінің 200-ге жуық түрі мен сорттары бар ботаникалық бақтың жылыжайы 2012 жылы пайдалануға берілген. Мұнда сәндік гүлдер, ағаштар мен бұталар өсіріле бастаған. EcoStudentKZ челленджі аясында облыс орталығындағы жоғары оқу орындарының студенттері мен қала жастары ботаникалық бақтың бір гектардан астам аумағын тазалап, жылыжайға гүл, ағаштар отырғызды.
Жастардың бұл бастамасы өңір тұрғындарына да ой салып, тазалыққа жауапты тиісті мекемелердің жұмысын жандандыра түсуіне септігін тигізері анық. Осы орайда, күні кеше облыс әкімдігінде қоршаған ортаның тазалығы талқыланғанын айта кетелік. Өңірде ғарыштан түсірілім жасау арқылы өткен жылы 347 заңсыз қоқыс орны анықталса, биыл олардың саны 400-ден асқан. Алайда жүзден астамында жұмыс баяу.
Облыс әкімі Дархан Сатыбалды апталық аппарат отырысында тұрмыстық қалдықтар тастайтын полигондары қараусыз қалған аудан, қала басшыларына жұмысты ширатуды тапсырды. Тазалықты қамтамасыз ете алмай отырғандар облыс әкімінен ескерту алды.
«Күл-қоқысты тазалай алмаған әкімнің басқа тірлігі туралы айтудың өзі артық. Тазалық – табалдырықтан басталады. Айналамызды таза ұстау өз қолымызда. Мәселені бюджетке бұрып қойып отыру – ақылға қонымсыз. Бұл тірлік – тікелей өз міндеттеріңіз. Тазалықты ретке келтіре алмай отырған әкімдерге шара қолданылсын», деді облыс әкімі.
Облыстық табиғи ресурстар және табиғат пайдалануды реттеу басқармасының мәліметінше, облыс аумағында қатты тұрмыстық қалдықтар тастайтын 158 полигон орны белгіленіп, құжаттандырылған. Алайда олардың жартысынан астамы санитарлық талаптарға сәйкес келмейді. Атап айтқанда, полигондар қоршаумен жабдықталмаған, көліктердің дөңгелектерін дезинфекциялаушы бетон ваннасы мен арнайы ерітіндісі жоқ, қалдықтардың көлемін өлшейтін таразы қойылмаған және көгалдандырылмаған. Сондай-ақ басқарма басшылығы халық арасында түсіндіру жұмыстары өз деңгейінде болмағандықтан ауыл-аймақтарда күл-қоқыстарды кез келген жерге тастап кету фактілері жыл сайын көбейе түскенін айтады. Осы бағытта кемшілікті жою мақсатында жыл басында жұмыс тобы құрылып, аудан, қала аумақтарын аралап, бей-берекет қоқыс орындарын жою бойынша түсіндіру жұмыстары жүргізіліпті. Облыс аумағында тұрғындар санының артуына байланысты, қатты тұрмыстық қалдықтар көлемі де артуда. Өткен жылы қоқыстарды қайта өңдеу үлесі бойынша меже толық орындалған. Биыл да жұмыстар атқарылуы қажет. Полигондар мәселесін түпкілікті шешу мақсатында Қазығұртта – 4, Созақта 1 полигонның құрылысы жергілікті бюджет есебінен жүргізілген. Созақ, Ордабасы аудандарында 8 полигон салу жоспарда бар. Сонымен қатар Кентау, Арыс қаласы мен Қазығұрт, Бәйдібек, Келес және басқа аудандарда 37 полигонның жобалық-сметалық құжатын әзірлеу бағытында жұмыс атқарылуда. Яғни өңірде қоршаған ортаның тазалығына қатысты шешімін күткен мәселелер баршылық. Бұл орайда EcoStudentKZ челленджі және экосенбіліктер арқылы жастар экологиялық тазалықтың сақталуына өзіндік үлесін қосып отыр.
– Қоғамның қозғаушы күші – жастар. Осы ретте EcoStudentKZ челленджі сынды игі істің жас буын өкілдерінен бастау алғаны қуантады. Жастар осы бастама арқылы да туған елдің табиғатына жанашырлық танытуда. Келешекте бастамамыз баянды болып, біз қолға алған іс жалғасын табар деген үміттеміз. Бүгінгі іс-шара бір реттік емес, алдағы уақытта да экосенбіліктер ретінде киелі қалада, өңір аумағында жалғасын табары сөзсіз. Яғни бұл бағытта жастардың белсенділігін, тазалық акцияларының тиімділігін арттыруды мақсат етіп отырмыз, – дейді Жастар ресурстық орталығының өкілі Нұрайым Қуандық.
Қоршаған ортаны таза ұстауға үнделген іс-шара эстафетасын түркістандық жастар тараздық замандастарына жолдады.
Түркістан облысы