Бұл – «Қазақстан Республикасының Ұлттық инженерлік академиясы» республикалық қоғамдық бірлестігінің жалпы жиналысына қатысқан ғалымдар мен инженерлердің ортақ тұжырымы. Оқу ордасының отырысында «Қазақстан Республикасындағы сайлау туралы» Конституциялық заңының 55-бабына сәйкес Қасым-Жомарт Тоқаевты Қазақстан Президенттігіне кандидат ретінде ұсыну туралы шешім бірауыздан қабылданды.
Жиналыс төрағасы, академик Бақытжан Жұмағұлов еліміздің ғылыми-инженерлік қауымдастығы кезектен тыс сайлау туралы хабарды үлкен жауапкершілікпен қабылдағанын атап өтті. «Біз бұл шешімді толықтай қолдаймыз. Алдағы саяси науқан әлемдік экономикалық дағдарыстың күшеюі мен шиеленіскен геосаяси жағдайда Қазақстан дамуының жаңа кезеңінің талаптарына жауап береді», деді Б.Жұмағұлов.
Жиынға қатысушылар осы аса маңызды мәселе бойынша өз ұстанымдарын білдіруді өздерінің азаматтық борышы деп санайды. Отырыста академияның вице-президенттері, академиктер Нұрлан Темірбеков пен Амандық Төлешев, машина жасау және тау-кен, геология бөлімшелерінің төрағалары Мейірбек Молдабеков пен Болат Ужкенов, ҰИА Батыс Қазақстан және Жамбыл филиалдарының төрағалары Ақсерік Әйтімов пен Сағат Жүнісбеков, академик Айсұлтан Қалыбаев және басқа да академия мүшелері сөз сөйлеп, саяси маңызы мол науқанға қатысты ой-пікірлерін ортаға салды.
Ғалымдар мен инженерлер Мемлекет басшысы Қ.Тоқаевтың Қазақстанның түбегейлі реформасы және «халық үніне құлақ асатын мемлекет» тұжырымдамасы, сайлау жүйесінің форматын дамыту, мемлекеттік басқару жүйесінің кәсібилігі мен жауапкершілігін арттыру сияқты маңызды мемлекеттік бастамаларды әзірлеу және жүзеге асырудағы рөлі ерекше екенін атап өтті. Сондай-ақ жиынға қатысушылар қазіргі заманғы жоғары білікті ғылыми және инженерлік кадрларды даярлаудағы жаңа тәсілдер, ғылымды дамыту және оны экономикалық процестерге белсенді түрде енгізу, сыбайлас жемқорлық олигархиялық моделінен дәйекті түрде кете отырып, экономиканы интенсификациялауға қатысты ойларын ашық айтып, нақты ұсыныстарын жеткізді.
«Күрделі кезеңдегі аса маңызды мақсат – қазақстандықтардың бастамасы мен шығармашылығының өсуіне, қазіргі заманғы технологиялық және инновациялық дамуға негізделген Әділетті Қазақстанды құру. Қазақстанның даму стратегиясының принципті жаңа іргетасы іс жүзінде қаланды», деп атап өтті академик Н.Темірбеков.
«Мұндай саяси бағыт отандастардың күткені мен үмітіне толық сәйкес келеді. Ғалымдар мен инженерлер Қазақстанды алдағы сынақтардан абыроймен алып шығатын қазіргі Мемлекет басшысы екеніне сенімді. Қасым-Жомарт Кемелұлының халықаралық көшбасшы, БҰҰ жоғары басшылығының мүшесі, Қазақстанның көрнекті мемлекет қайраткері ретіндегі мол тәжірибесі – осының кепілі. Әрине, бұған қоса өте қиын жағдайда да халықтың сеніміне және қазақстандықтардың өмірін жақсартуға бағытталған Президенттің жинақтаған тәжірибесі мол.
Еліміздің мыңдаған ғылыми және инженерлік корпусы Президент Қ.Тоқаевтың жанына топтасқан және Қазақстанның жаңа белестерге түбегейлі серпілісін қамтамасыз ететін міндеттерді орындауға бар күш-жігерін салады. Сондықтан академия Қ.Тоқаевтың кандидатурасын бірауыздан қолдайды», деді ҰИА президенті Б.Жұмағұлов.
