Коллажды жасаған Зәуреш СМАҒҰЛ, «EQ»
Елге қайтқан соң, оның әндерін тауып, өмірбаянымен жақын таныстым. Ағылшын тіліндегі әрбір музыкалық шығармасы өнерсүйер жұрттың құлағының құрышын қандырып, әлдеқашан әлем сахнасын мойындатып үлгерген тұлғаны кеш те болса білгеніме қуандым. Өнерін бағаламаса, тамсанбаса, өркениетті қоғамның тыңдарманы оған жайдан-жай «Дауыс» деген лақап ат қоймайды ғой. Оның ән таспалары күні бүгінге дейін жер жүзіндегі ең көп сатылымға ие болды. Нақтырақ айтсақ, бүкіл әлем бойынша 200 миллионнан астам үнтаспасы сатылып, рекорд жасады. Сондықтан оның өзгеше таланты мен ән сахнасындағы талғамы осы саладағы көптеген әншіге әсер етті. Оның тағы бір даралығы, вокалдық музыканы импровизациялаудағы күшті қуаты еді. Әлі күнге оның бұл ерекшелігін ешбір музыка майталманы қайталай алған жоқ. Хьюстон фильмге түскеннен кейін оның танымалдығы үш есе артты. Адал еңбегімен өнер саласында екі рет Эмми сыйлығын, алты мәрте Грэмми сыйлығын, он алты рет Billboard музыкалық марапатын жеңіп алды.
Оның үлкен өнерге деген талпынысы сонау бала кезінде шіркеуде ән айтып жүргенде басталған. 1981 жылы ол жасөспірім модель болып көзге түскен соң, көп өтпей оның суреті Seventeen журналының мұқабасына басылды, бұл тарихтағы алғашқы қара нәсілді әйелдің аталған журналдың бас бетіне шығуы еді. Әншінің тағдырын өзгерткен оқиғалар бір бұл емес, оның алғашқы екі ән альбомы Billboard 200 тізімінде бірінші орынға ие болды әрі сол орнын сақтап қалды.
Хьюстон өзінің актерлік дарынын «Оққағар» фильмімен бастады. Аталған фильм осыған дейін ең көп табыс тапқан фильмнің бірі ретінде кино тарихында алтын әріппен жазылды. Өзі рөл ойнаған фильмнің саундтрегі болған «Мен сені әрқашан сүйемін» әні жыл рекорды үшін Грэмми сыйлығын жеңіп алды.
Әннің де естісі бар екенін бұл қоғам баяғыда-ақ сезінді, түсінді. Жылтыраққа құмар топтың тыңдайтыны сол баяғы қуатсыз, күйсіз, нәрсіз музыка. Ал Хьюстон айтқан әндердің тыңдау үшін де адамға ой көзі керек, көңілге алтын сәуле керек. Оның айтқан әндері құдды оның мәртебесі сияқты зәу биіктен түскен жоқ. Мейлі оның жүрекжарды әндерін көлікте, әсем табиғат аясында, тіпті жалғыз қалғанда тыңдасаңыз да сізге сыйлар ләззаты біреу ғана, ол – өмірге құштарлық.
Қайбір жылы Димаш көптің көңілінен орын алып, әндерін шетелдіктер құлай тыңдап жатқанда, мәртебеміз биіктеп, қуанып жүрдік. Оның өнеріне баға берген шетелдік сарапшының бірі «Димаштың дауысымен соғысты тоқтатуға болады», деді. Ән шолпандарына бұндай биік баға ешқашан айтылған жоқ, айтылса да Майкл Джексонға ғана айтылған шығар.
Димаш мейлі халық әндерін, мейлі авторлық әндерді орындасын, бәрі оның дауысымен бірге зеңгір көкке ақ қанат көгершіндей қалықтап ала жөнеледі. Затаевич кезінде «Енді он жылда қазақ әншісі патшаның алдында ән салады» дегенді текке айтпаса керек, даралық пен даналықты тау мен шың құздардан үйренген кең халықтың өнері мен мәдениеті келесі ғасырларда да өркен жаярын аңдаған да шығар. Біздің Димаш патшаның да, алпауыт елдердің президенттерінің де алдында қазақ үнін самғатты. Осындайда қазақтың «Астынан алты қырдың үні естіліп» деген керемет теңеуін ойға аласыз. Оның дауысындағы нәзіктік пен өнеріндегі тазалық оны кешегі Хьюстондар жеткен биік сахналарға жетеледі, әлі де жетелей бермек.
