Қазақстан сауда рәсімдерін оңайлатады

Сауда және интеграция министр­лігінің хабарлауынша, зерттеудің негізгі бағыты – сауда рәсімдерін жеңілдету және экспортты ілгерілету. Сарапшылардың пікіріне қарағанда, сауда рәсімдерін жеңілдетудегі шағын жетістіктердің өзі дамудың кез келген деңгейіндегі елдерде шағын және орта бизнесті экспорттаушыға айналдыру мүмкіндігін 3 пайызға дейін жеделдетуі мүмкін. Кедендік рәсімдерді автоматтандыру сияқты салалар ШОБ кәсіпорындарының экспортын 4,4-6,5 пайызға дейін арттырмақ.

Соңғы сегіз айдағы геосаяси өзгерістерге және дәстүрлі логис­ти­калық тізбектердің үзілуіне қара­мастан, Орталық Азиядағы сау­да байланыстары берік болып қала береді. 2022 жылдың 8 айын­да Қазақстанның Орталық Азия ел­дерімен тауар айналымы 4,8 млрд долларды құраған. Бұл өткен жыл­дың сәйкес кезеңімен салыстырғанда 26,8 пайызға жоғары.

Орталық Азия елдеріне үш жалпы үрдіс тән. Бұл – өңірішілік сауданы күшейту, трансшекаралық қағазсыз саудаға көшуді қоса алғанда, сауда рәсімдерін оңайлату және экспортты қолдаудың толыққанды экожүйесін қалыптастыру.

ЭЫДҰ сарапшылары өз жұмы­сында Орталық Азия елдерін­дегі сауда рәсімдерін жеңілдетуді 11 индикатор бойынша бағалады. ЭЫДҰ сауда саясаты бөлімшесінің, сауда және ауыл шаруашылығы бөлімінің талдаушысы Сильвия Сореску Қазақстанның ашықтығы мен болжамдылығы, кедендік рәсімдерді автоматтандыру, баждар мен алымдар сияқты көптеген позиция бойынша көрсеткіштері орта деңгейден жоғары және өңірдегі көршілерден озық екенін атап өтті. Құжаттарды ұсынуға қойылатын талаптарды оңтайландыру, оларды электронды түрде беру және сауда саласында «бір терезе» қызметін құру саласында айтарлықтай прогреске қол жеткізілген. Сондай-ақ семинар барысында ол сауда рәсім­дерін оңтайландыру үшін күш салудың негізгі мәселелері мен перс­пективалық нүктелерін де айтты.

Қазір салалық ведомство сауда рәсімдерін оңайлату бойынша белсенді жұмыс жүргізуде және Орталық Азия елдерімен сауда ынты­мақтастығын дамытуға елеулі көңіл бөліп жатыр.

Еске салып өтейік, жобаның екінші кезеңі Орталық Азия елдері арасындағы сауда қатынастарын нығайтуға бағытталған. Жобаның мақсаты Орталық Азияның алты еліне – Қазақстан, Қырғызстан, Тәжік­стан, Түрікменстан, Өзбекстан, Ауған­станмен сауда байланыстары мен халықаралық интеграцияны кеңейту үшін өз мүмкіндіктерін барынша пайдалануға жағдай жасайтын саясат пен құралдар бойынша талдамалық және практикалық басшылықты беру. Жобаны ЭЫДҰ Сауда және интеграция министр­лігімен және «QazTrade» АҚ-мен ынтымақтастықта іске асыруда. Жобаның ұзақтығы – 2 жыл.