Cuba Domadores – Бүкіләлемдік бокс сериясының жеңімпазы

АСТАНА. Маусымның 7-сі күні түнде Әзербайжан астанасы – Баку қаласында Бүкіләлемдік бокс сериясының финалдық матчтары аяқталып, оның қорытындысында Кубаның Cuba Domadores командасы бас бәйгені жеңіп алды. Бұл туралы ВКонтактe әлеуметтік желісінің дерегіне сүйенген egemen.kz тілшісі хабарлады. Биыл төртінші мәрте мәреге жетіп жатқан серияның финалында Әзербайжанның Azerbaijan Baku және Кубаның Cuba Domadores жасақтары кездесті. Олардың 6 маусым күні өткен бірінші кездесулерінде кубалықтар 3:2 есебімен жеңіске жетті. Онда 49 килолық кубалық Йосвани Вейтиа – әзербайжан Хамза Наметовті, 75 килолық Арлен Лопес – Хайбула Мусаловты, 91 килолық Эрисланди Савон Абдулкадыр Абдуллаевты 3:0 етіп жеңсе, Баку командасындағы 56 килолық ресейлік легионер Магомед Курбанов – кубалық Норлан Йераны 3:0, 64 килолық Гайбатулла Хаджиалиев Ясниер Толедо Лопесті 2:1 есебімен ұтты. Ал келесі, 7 маусым күнгі матч та тап осындай есеп тіркелді. Бірақ онда бакуліктер ұтысқа ие болды. Олардың арасында 52 килолық Эльвин Мамишзаде – Жерардо Кервантесті 3:0, 60 килолық Альберт Селимов – Лазаро Альваресті, 91 килодан ауыр салмақтағы Арсланбек Махмудов қарсыласы Джойс Лардуетті 2:1 етіп тізе бүктірді. Кубалықтар сапынан 69 килодағы Росниел Иглесиас – беларусьтік Магомед Нурутдиновті, 81 килодағы Хулио Сезар де ла Крус тағы бір Беларусь азаматы Михаил Довголянецті 3:0 етіп ұтып шықты. Сөйтіп, екі кездесудің қорытындысында есеп теңесті – 5:5! Сондықтан қосымша алтынша жекпе-жекке кезек келді. Онда 69 килоға дейінгі салмақтағы кубалық Ариспойд Деспайн мен келесі белорус Евгений Ромашкевич сынға түсті. Ұрыс Бостандық аралы өкілінің толық жеңісімен (3:0) бітті. Осының нәтижесінде бұл күннің есебі 3:3-ке тоқтады. Бұл Cuba Domadores командасының бас бәйгеге қол жеткізуін қамтамасыз етті. Дамир Қожамқұл. Дереккөз: ВКонтакте. Фото: ВКонтакте.