Өнер • 29 Қаңтар, 2023

Күй рухы асқақтаған кеш

312 рет
көрсетілді
3 мин
оқу үшін

Л.Н.Гумилев атындағы Еуразия ұлттық университетінде Астана қаласы әкімдігінің Еркеғали Рахмадиев атындағы Мемлекеттік филармониясы Қазақ ұлт аспаптары оркестрінің «Қазағымның күйлері-ай» атты концерті өтті. Оны аталған оқу ордасындағы «Кәусар» мәдени-танымдық бірлестігі ұйымдастырды.

Күй рухы асқақтаған кеш

Биыл елордалық Қазақ ұлт ас­пап­тары оркестрінің құрылғанына 25 жыл толады. Әр кезеңде өнерлі ұжымды танымал күйші, компози­тор, дирижер Мұхаметқали Тін­а­лин, Қазақстанның еңбек сіңірген қайраткері Мырзағали Айдаболов секілді азаматтар басқарды. 2008 жылдан бері оркестрге күйші, композитор, дирижер, Қазақстанның еңбек сіңірген қайраткері Айтқали Жайымов жетекшілік жасайды. Аталған ұжымда жүзге жуық музыкант еңбек етеді. Сонымен қатар оркестр репертуары халықтық, кәсіби және академиялық музыканы қамтиды. Дегенмен концерттік бағдарламалардың біраз бөлігін домбыра күйлері құрайды.       

фыв

Әсем сазға толы кештің ашы­луында «Кәусар» мәдени-таным­дық бірлестігінің жетекшісі, әнші, Абай атындағы Мемлекеттік сыйлық­тың лауреаты Кенжеғали Мыржық­бай сөз алып, алдымен астаналық Қазақ оркестрінің тарихы мен оның негізін қалаған қайраткерлердің өнер жолына тоқталып, жастарға тағылымды ой салар әңгіме өрбітті.

Концерт Құрманғазы, Дәулет­керей, Тәттімбет және Дайрабай секілді атақты күйшілердің біре­гей шығармаларымен бас­та­­лып, одан кейін Нұрғиса Тілен­диев­тің «Махамбеті», Сыдық Мұха­меджановтың «Шаттық Отаны», Кенжебек Күмісбековтің «Аяулы мекені» және Әбдімомын Желді­баевтың «Ерке сылқымы» секілді туындылары орындалып, күй рухын асқақтатты. Сондай-ақ күйші, Қазақстанның еңбек сіңірген қай­раткері Анар Мұздаханова Ахмет Байтұрсынұлының 150 жылдығына арнаған «Ұстазға тағзым» атты күйі мен қобызшы Жанар Жүсіпова «Аққу қаздар» атты музыкалық туын­дысын тарту етті. Дәстүрлі әнші Данияр Мұқан Естайдың «Майдақоңыры» мен Манарбек Ержановтың «Сайра, бұлбұлын» шырқады.

Домбыра үні күмбірлеген кеш көрермендерге ерекше ұна­ды. Мә­селен, Елтаңба авторы Жан­дар­бек Мәлібеков алған әсе­рі­мен бөлісе келіп: «Маған осы уни­верситеттің қабырғасында Испа­нияның өнер шебері, гита­рист Хавьер Арсе Йебраның шығар­ма­шылық кеші мен қазаққа алып Абайды, шыңырау Шәкәрімді, маңғаз Мұхтарды берген Семей өңірінің Шыңғыстаудағы «Қалам­қас» халық ән-би ансамблінің концерті ерекше ұнап еді. Енді сол қатарға «Қазағымның күйлері-ай!» атты бүгінгі кешті қосып отыр­мын. Шынымды айтсам, хал­қы­мыздың шынайы болмысын бей­не­леген рухы биік күйлерді тың­дап, ұлы далаға саяхаттағандай әсер алдым. Осы мәдени іс-шараны ұйым­дас­тырушыларға алғысымды айтамын», деді ол.

Концерт соңында сөз алған Л.Н.Гумилев атындағы Еуразия ұлт­тық университетінің ректоры Ерлан Сыдықов демалыстан жа­қында оралған студенттерге бұл кештің сыйлаған рухани құнары мол болғанын айтты. «Жалпы, Кен­жеғали Мыржықбайдың же­тек­шілігімен «Кәусар» мәде­ни-танымдық бірлестігі универ­сите­тімізде тәрбиелік мәні зор көптеген кездесу өткізді. Мәселен, елорда филармониясына есімі берілген көрнекті композитор Еркеғали Рах­мадиевпен өмірінің соңғы жылдарында осы залда кездесіп, ардақ­ты ағамыздың парасатты әңгімесін тыңдап едік» деп, елордалық фи­лар­монияның Қазақ ұлт аспаптары оркестрінің дирижері Нұрлан Бекеновке «Лев Гумилев» медалін табыс етті. 

Соңғы жаңалықтар

Су үнемдейтін қондырғы

Технология • Кеше