Елорда • 01 Ақпан, 2023

Қазақстандағы инфляция өсімі бойынша Астана көш бастап тұр

191 рет
көрсетілді
1 мин
оқу үшін

Қасым-Жомарт Тоқаев елорданы дамыту жөніндегі кеңес отырысында қаланың өте өзекті мәселесінің бірі ретінде инфляцияның жоғары болуын атап өтті, деп хабарлайды Egemen.kz.

Қазақстандағы инфляция өсімі бойынша Астана көш бастап тұр

«Былтырғы қорытынды бойынша бағаның қымбаттауы 23 пайызға жеткен. Бұл – республикадағы ең төменгі көрсеткіштердің бірі. Астанада азық-түлік бір жылда орта есеппен 25 пайызға қымбаттады. Әкімдік тұрақтандыру қорында резерв жинауды қойып, «айналым схемасы» аясында сауда желілеріне жеңілдікпен займ беруге көшті.

14 миллиард теңге бөлінді. Бұл – өңірлер арасындағы ең жоғары көрсеткіш. Қабылданып жатқан шаралардың тиімсіз екені анық. Жылдар бойы елорданың айналасында азық-түлік белдеуін дамыту туралы айтылды, бірақ жұмыс орындалмады», деді Президент.

Президенттің айтуынша, Астана азық-түлікті Алматыдан 4 есе, ал Шымкенттен 2 есе аз өндіреді. Жалпы барлық өңірмен салыстырғанда қала бұл көрсеткіш бойынша көш соңында келе жатыр.

«Кейінгі 8 жылда елордаға әкелінген азық-түлік импорты 3 есеге артты. Негізінен осы жерде шығаруға болатын өнімдер туралы сөз болып отыр. Бұл ретте жергілікті қайта өңдеу кәсіпорындары тек жарым-жартылай жұмыс істеп тұр.

Көкөніс сақтайтын қойманың жетіспеуі салдарынан жағдай қиындап отыр. Сондықтан 2025 жылға дейін қалада 13 мың тоннадан астам көкөніс сақтайтын қоймалар салу керек. Ауыл шаруашылығы министрлігіне Астана қаласы мен Ақмола облысының әкімдіктерімен бірлесіп, елорданың айналасында азық-түлік белдеуін қалыптастыру жөнінде пәрменді шаралар қабылдауды тапсырамын», деді Мемлекет басшысы.