Қазақстан • 02 Ақпан, 2023

Өндіріс көлемі кеміген

272 рет
көрсетілді
3 мин
оқу үшін

Әлемдегі геосаяси жағдайдың тұрақталмауы өңірдегі ірі кәсіпорындардың өндіріс көлеміне де кері әсерін тигізіп жатыр. Мәселен, Лисаков, Рудный қалаларында темір, боксит өндіру, темір кені концентраттары мен түйіршіктер өндірісі 80,6 пайызға дейін кеміген.

Өндіріс көлемі кеміген

Бұл туралы облыс әкімі Құмар Ақсақаловтың төрағалығымен өткен өңірдің 2022 жылғы әлеу­мет­тік-экономикалық дамуын қо­ры­тындылауға арналған кеңес­те айтылды. Аймақ басшысы жиын барысында өндіріс саласы өрістемей отырған аудан­дардың басшыларын сынға алды. Мәселен, Денисов ауданында қиыршық тас, ет, нан, Меңдіқара ауданында май және сүт, сүзбе және нан өндірісінің көрсеткіші жоспарланған межеден анағұрлым төмен.

Кеңесте Қамысты және Де­нисов аудандарының әкімдері есеп берді. Аталған екі ауданда да жос­пар жеткілікті деңгей­де орын­далмаған. Әкімдердің есебін талқылау барысында аудан басшылары жаңа жоба түзу­дің орнына, осыдан екі-үш жыл бұрынғы жұмыстарын қайталап көрсетіп, өздерін де, өзгені де алдарқататыны белгілі болды.

Облыс әкімі өздері басқа­рып отырған өңірдің даму дең­гейін төмендетіп алған екі ауданның басшысын тәртіптік жазаға тартты. Ал тиісті көрсет­кіштерге қол жеткізбеген Алтын­сарин, Федоров, Қостанай аудандары мен Қостанай, Рудный қала­лары әкімдерінің есебі бірін­ші тоқсанның соңында тыңдалатын болады.

Өңірде трактор, комбайн құрастыруда, азық-түлік өндірі­сінде құлдырау байқалады. Сары май өндірісі 2021 жылғы дең­гейден ілгерілемеген. Инвес­тиция тарту жағы да көңіл көн­шіт­пейді. Қостанай, Рудный және Б.Майлин аудандарындағы өн­діріс ошақтарына құйылған қомақты қаржыны қоспағанда, қалған өңірлер инвестицияны бюджет есебінен толықтырып отыр. Әкімнің айтуынша, бұл жерде өңірлерді әртараптандыру жайлы сөз қозғаудың өзі артық.

– Жақында Арқалықта неф­роид өңдейтін зауыт салуға ниет­ті инвесторларды қабылдадым. Олар екі жыл бойы кабинет жағалап, құзырлы министрліктен рұқсат ала алмай жүр. Мұндай­ды уыстан шығаруға бола ма? Мәселе толық шешілмейін­ше, министрлікті мазалай беру керек. Торғай боксит кеніші жабыл­ған соң, Арқалықтағы көп адам жұмыс­сыз қалды. Мынау ел үшін пайдасы мол жоба емес пе! Екін­ші мысал, Лисаков қала­сын­дағы кремний карбидін өндіретін зауыт салу туралы әңгіме 2019 жы­лы шыққан. Бірақ ол сол айтыл­ған күйі қалды. Әлі күнге қоз­ғалыс жоқ. Халықты бұлай алда­­мау керек. Ал сіздер басқа жоба бол­мағандықтан, баяғы бір жобаны шиырлай бересіздер. Инвестиция тарту – аудан, қала әкімдерінің негізгі жұмысы. Ал ол жұмыс жеткіліксіз екендігін көріп отырмын, – деді Құмар Ақсақалов.

 

Қостанай облысы