Қаржы • 02 Ақпан, 2023

Икемді бағам режімі

237 рет
көрсетілді
2 мин
оқу үшін

Қаңтар айының қорытындысы бойынша теңге бағамы 1 доллар үшін 460,52 теңгеге дейін, 0,5 пайызға нығай­ған. Қазақстан қор биржасындағы сауда-саттық­тың бір күндегі орташа көлемі бір айда 141-ден 103 млн долларға дейін төмендеді. Сауда-саттықтың жалпы көлемі 2,1 млрд долларды құрады.

Икемді бағам режімі

Ұлттық банктің хабарлауынша, бір ай ішінде валюта нарығы сұраныс пен ұсыныс тұрғысынан теңгерімді болды, айырбастау бағамы на­рық­тық жағдайларға байланысты қалыптасты.

«Квазимемлекеттік сектор субъектілерінің валюта­лық түсімді сатуы өткен айда шамамен 453 млн долларды құрады. Квазимемлекеттік сектор компаниялары екінші деңгейлі банктер арқылы валюта нарығында сатуды өз алдына дербес жүргізді. Ұлттық қордан республикалық бюд­жетке трансферттерді қам­тамасыз ету үшін валюта сату қаңтарда 228 млн доллар болды. Ұлттық қордан сату үле­сі сауда-саттықтың жалпы көлемінен 11,1 пайыз болды және бір күнде 12 млн доллардан аспады. Ұлттық қор­дың қаражатымен операциялар жүргізу кезінде Ұлттық банк нарықтық бейтараптық қағидатын сақтайды. Бұл шетел валютасын тұрақты әрі біркелкі сату дегенді білді­реді. Мұндай тәжірибе валю­та нарығына Ұлттық қор опе­рацияларының әсерін барын­ша азайтуға мүмкіндік бере­ді», делінген хабарламада.

БЖЗҚ зейнетақы актив­тері­нің валюталық үлесін 30 пайыз деңгейінде ұстап тұру мақ­сатында Ұлттық банк қаң­тарда биржалық сауда-сат­тықта шетел валютасын сатып алуды жүзеге асырған. Оның жалпы сомасы 120 млн доллар немесе нарықтың жалпы көлемінен шамамен 5,8 пайызды құрады.

Сондай-ақ қаңтарда Ұлт­тық банк валюталық интервенциялар жүргізбеген. ҰБ сарапшыларының айтуынша, қысқа мерзімді перспективада теңгенің динамикасы геосаяси жағдайдың өзгеруіне, ішкі қатысушылардың күтулеріне және әлемдік нарықтардағы жағдайға байланысты болады. Ұлттық банк теңгерімсіздіктің жинақталуына жол бер­мей­тін және алтын-валюта ре­зервтерінің сақталуын қамта­ма­сыз ететін икемді бағам белгілеу режімін ұстануды жалғастырады.