Кеше Байланыс және ақпарат қызметкерлері күніне орай, Қазақстан Президенті Әкімшілігі Басшысының орынбасары Бағлан Майлыбаевтың қатысуымен Қазақстан халқы Ассамблеясының этносаралық қатынастар мәселесі жөніндегі жетекші журналистер мен сарапшылар клубының отырысы өтті. Отырыста ҚХА қызметін ақпараттық сүйемелдеу жөніндегі мәселелер және 2015 Қазақстан халқы Ассамблеясы жылын БАҚ-тарда насихаттау бойынша міндеттер, этносаралық келісімді нығайту жөніндегі іске асырылып жатқан жобалар, ҚХА-ны өңірлік деңгейде насихаттау бойынша жүргізілген жұмыстар жайы талқыланды.
Б.Майлыбаев Қазақстан халқы Ассамблеясы XXI сессиясының қоғам үшін маңызына тоқталды. «Бұл сессияның соңында тарихи шешімдер қабылданғанын білесіздер. Ал олар өз кезегінде осы институттың жұмысын жандандырып, одан әрі жетілдіре түсетіні анық. Қазір Мемлекет басшысы Нұрсұлтан Назарбаев берген тапсырмалар бойынша ауқымды жұмыстар атқарылуда. Егер де біз әлемнің 30 дамыған елінің қатарына қосылғымыз келсе, онда елімізде этносаралық тұрақтылық пен конфессияаралық келісім болуы керек. Бұл бағытта, яғни Ассамблея қызметінің дамуына, қоғамда келісім орнауына үлес қосуда журналистердің еңбегі айрықша», – деді ол.
Қазақстан халқы Ассамблеясы Төрағасының орынбасары Ералы Тоғжанов өз сөзінде ел бірлігін, патриотизмді, ұлтаралық татулықты дамытуда БАҚ өкілдерінің рөлі ерекше екенін атап көрсетті. «Біз Байланыс және ақпарат қызметкерлері күні қарсаңында Қазақстан халқы Ассамблеясы жанындағы Журналистер мен сарапшылар клубының кезекті отырысында бас қосып отырмыз. Сөз құдіретіне бас иген халықтың ұрпағы үшін бұл күн шынында да маңызы ерекше мереке. Қалам ұстап, ой терген барша ақпарат саласының қызметкерлерін бүгінгі кәсіби мерекесімен құттықтаймыз. Киелі ұғымға айналған басты құндылығымыз – қоғамдық келісімді елге таратуда, санаға сіңіру мен сақтауда, Қазақстан халқы Ассамблеясының осы бағыттағы қызметін қоғамға түсіндіру мен насихаттауда сіздердің еңбектеріңіз зор», деді Е. Тоғжанов.
Осылай дей келе, ол бұл басқосудың мақсаты БАҚ өкілдерімен бірге Қазақстан халқы Ассамблеясы қызметін ақпараттық сүйемелдеу бағытындағы жұмыстарды талқылап, алдағы уақытта бірлесе атқарылатын міндеттерді анықтап алу екенін жеткізді. «Елбасы Нұрсұлтан Назарбаев Ассамблеяның ХХІ сессиясында 2015 жылды Қазақстан халқы Ассамблеясы жылы деп жариялау туралы тапсырма бергені баршаңызға мәлім. Бүгін, міне, осы және басқа да мәселелер бойынша қазақстандық журналистермен, сарапшылармен бірлесе отырып пікір алмасатын уақыт келді», деді ол.
Отырыс аясында сөйлеген сөзінде Ералы Тоғжанов Қазақстан халқы Ассамблеясының Этносаралық қатынастар мәселелері жөніндегі журналистер мен сарапшылар клубы Ассамблеяның XV сессиясында Мемлекет басшысының тапсырмасымен құрылғанын, бұл клуб БАҚ-ты жұмылдыратын кеңестік-сарапшылық алаңға айналғанын, оның мақсаты – этносаралық және конфессияаралық келісімді нығайту екенін атап өтті. Оның айтуынша, осы жылдар аралығында аталған клуб Ассамблея жұмысын ақпараттық жағынан қолдау бағытында айтарлықтай жұмыстар атқарған.
Мәселен, Журналистер мен сарапшылар клубының мүшелері Ассамблеяның бірқатар стратегиялық және бағдарламалық құжаттарын әзірлеуге өз үлестерін қосыпты. ҚХА жұмысын насихаттайтын журналистер мен Президент Әкімшілігінің идеологиялық құрылымы арасындағы тығыз байланыс орнап отыр екен. «Бұл бағытта журналистер ақпараттық жұмыстар мен медиа-жоспарларды жүзеге асыруда белсенділік танытып келеді», деді Е. Тоғжанов. Сондай-ақ, ол соңғы 6 ай ішінде БАҚ-та этносаралық татулық, қоғамдық келісім мәселелері бойынша 3903 материал шыққанын атап көрсетті. Олардың 592-сі басылымдарда жарық көрсе, 425-і телеарналардан берілген. Ал 2886 ақпарат интернет-ресурстарда жарияланыпты.
Сөзінің соңында Қазақстан халқы Ассамблеясы Төрағасының орынбасары қоғамдық келісім мен ұлттық бірлік мәселесі Қазақстан журналистері үшін кәсіби өсуінің негізіне айналғанын айта келе, Ассамблея қызметіне ақпараттық тұрғыда қолдау білдіруге күш салып жүрген БАҚ өкілдеріне шығармашылық табыс тіледі.
Жиын аясында, сондай-ақ, Парламент Сенатының депутаты Анатолий Башмаков, «Бас редакторлар клубы» ҚБ президенті Бибігүл Жексенбай, Л.Н.Гумилев атындағы ЕҰУ ЮНЕСКО кафедрасының профессоры Әділ Ахметов, «Южный Казахстан» облыстық газетінің бас редакторы Марина Лимаренко, «Қазақстан» РТРК Қарағанды облыстық филиалының редакторы Әшімхан Жәмпейісов сөз алып, этносаралық келісімді нығайту мен ҚХА қызметін насихаттау бойынша алдағы уақытта жүргізілуі тиіс жұмыстар жайын, сонымен қатар, өңірлік БАҚ-тардағы Ассамблея міндеттерін түсіндіру жөніндегі жұмыстар төңірегінде баяндап берді.
Басқосу аясында Қазақстан халқы Ассамблеясының шешімімен тәуелсіздікті, ел бірлігін нығайтуға, мәдениетаралық үнқатысуды дамытуға және қазақстандық патриотизмді тәрбиелеуге қосқан елеулі үлесі үшін бірқатар БАҚ өкілдері марапатталып, соңынан «Астана» радиосының директоры, «Бас редакторлар клубы» ҚБ президентінің орынбасары Гүлмира Қаракөзова «Мультимедиа-профи» тақырыбында шеберлік дәрісін өткізді.
Ахмед МҰРАДОВ,
Парламент Мәжілісінің депутаты:
– Тәуелсіздікті алған жылдары елімізде «бірлік» деген сөз алғаш айтыла бастаған кезде көптеген ұйымдар, қоғамдық бірлестіктер өздерін «шаңырақ» деп атады. Ол кезде бұл сөздің мағынасын біреу түсінді, біреу жете түсінбей жатты. Ал кейіннен біз Қазақстан халқы Ассамблеясын құрған кезде еліміздегі түрлі этнос өкілдері оның рухани мән-маңызына терең бойлай бастады. «Шаңырақ» сөзінің қасиетін де түсініп, бұл Қазақстанды өзінің Отаны деп санайтын азаматтардың ортақ идеясына айналды. Яғни, бүгінде «Қазақстан – менің Отаным» девизі Қазақстанның бағыт-бағдары, Қазақстан халқы Ассамблеясының ұстанатын идеясы болып отыр. Бір сөзбен айтқанда, Ассамблея рухани, мәдени, тарихи құндылықтардың басын біріктіретін маңызды институт болып қалыптасты.
Видади САЛАХОВ,
ҚХА мүшесі:
Қазақстан жерінде бір халық тұрады. Алайда, біз түрлі этностық топтарға бөлінеміз. Этностық сан алуандығына қарамастан, елімізде татулық пен бірлік, қоғамдық келісім – айрықша назарда тұрған мәселелердің бірі. Сол себепті, қазіргі таңда бұл жерде этносаралық және конфессияаралық кикілжіңдер орын алып отырған жоқ. Олар болған күннің өзінде тез арада шешімін табады деп ойлаймын. Себебі, Қазақстан өзінің тәуелсіздігін алған жылдардан бастап, ұлтжандылық идеясын өзінің басты ұстанымына айналдырып келеді. Бұл орайда, ҚХА-ның рөлі зор. Өйткені, қазіргі таңда Қазақстан халқы Ассамблеясы елімізде қоныс тепкен барлық этнос өкілдерінің басын біріктіруге, оларды бір мақсат жолында жұмылдыруға үлкен үлес қосып отыр.
Ләйла ЕДІЛҚЫЗЫ,
«Егемен Қазақстан».
