Мамандардың айтуынша, әлемдік рекорд орнату үшін ең алдымен курорт халықаралық стандарттардың барлық талабына сай келетін қалыпта жұмыс істеуге тиіс. Оған қоса шаңғы тебетін жол Халықаралық шаңғы федерациясының талабына сәйкес келуі керек. Гиннестің рекордтар кітабына ену үшін ең жоғары нүкте ретінде 3 100 метр биіктік белгіленген. Ал Шымбұлақ теңіз деңгейінен 3 200 метр биіктікте орналасқан. Сондықтан ол әлемдегі ең биік түнгі шаңғы трассасы ретінде Гиннес рекордын орнатты. Бұған дейін мұндай рекордтар ешқашан болмаған. Қазақстандағы тау-шаңғы курорты бірінші болып тіркелді.
Айтулы оқиға барысында Guinness World Records кеңсесінің судьясы Шейд Субаси-Гемиджи: «Қажетті құжаттардың барлығы тексерілді. Шаңғы базасына қатысты ақпаратты түгелдей қарап шықтық. Биіктігі өлшенді. Геодезистер мен арнайы мамандар жұмыс істеді. Трассаны өзіміз сынап көрдік. Жарықтандыру, жолды тегістеу жағына да оң баға беремін. Барлығы талапқа сай шықты», деп мәлімдеді.
Шейд Субаши-Гемиджи салтанатты оқиға арқылы Шымбұлақтан табылғанына бек қуанышты екенін айта келе, тау шаңғысы курортының бас директоры Ринат Әбдірахмановқа әлемдік рекордты растайтын сертификатты табыс етті. Сертификатты тапсыру рәсімі мен рекорд нәтижесін ресми тіркеу – теңіз деңгейінен 3 200 метр биіктікте «Талғар асуы» стансасында өтті.
«Шымбұлақ» тау курорты әлемдегі ең биік түнгі шаңғы трассасы ретінде ресми түрде Гиннес рекордын алғаны туралы сіздерге хабарлауға қуаныштымын. Бұл әлемдегі жаңа рекорд», деді Шейда Субаши-Гемиджи.
Салтанатты шараға Мәдениет және спорт министрі Асхат Оралов пен Алматы қаласы әкімінің орынбасары Арман Қырықбаев қатысты.
«Бүгін – тарихи күн. Біздің «Шымбұлақ» тау шаңғы курортымыз Гиннестің рекордтар кітабына енді. Бұл – бүкіл ел үшін үлкен жетістік. Әрине, біздің әлеуетіміз зор, Шымбұлақ – еліміздегі туризмді дамытудың негізгі орындардың бірі. Жалпы, қазіргі таңда Мәдениет және спорт министрлігінің араласуымен нақты қадамдар қабылданып жатыр. Атап айтқанда, елімізде алдағы жеті жылға арналған туризм саласын дамыту тұжырымдамасы әзірленді. Біз жергілікті атқарушы органдармен, серіктестермен, бизнес қоғамдастықпен бірлесіп инфрақұрылымды және туризмімізді дамытамыз», деді Асхат Оралов.
Өз кезегінде министр «Шымбұлақ» кәсіпорнының бас директоры Ринат Әбдірахмановқа әлемдік рекордты растайтын сертификатты аманаттады. Шара соңында қызыл лента салтанатты түрде кесіліп, ең биік түнгі тау шаңғысы трассасымен төмен қарай жаппай сырғанау өтті.
Теңіз деңгейінен 3 200 метр биіктікте түнде шаңғымен сырғанау 2021 жылдың қарашасында басталған еді. Осы уақыт ішінде жүздеген мың адам түнгі уақытта ең жоғары нүктеден түсіп үлгерді.
Тау шаңғысы курортының баспасөз қызметінің хабарлауынша, 2021-2022 жылғы маусымда түнгі шаңғымен сырғанауға 50 346 турист келген, биылғы маусымда 10% көп келді, яғни 55 486 келушілер болды. Сонымен қатар 2021-2022 жылғы маусымда күніне 12 520 адам келсе, биылғы маусымда курортқа 1 млн-нан аса адам келіп үлгерді.
«Бұл дегеніміз – ішкі туризм және сыртқы туризмді дамыту мақсатындағы жасап жатқан қадамдардың бірі және туристік маусымға қарайтын болсақ, нақты көрсеткіш бойынша тарихта алғаш рет ішкі және сыртқы туризмді қосқанда Шымбұлаққа 1 млн-нан аса турист келді. Әлеуетіміз зор. Бұл жұмысты біз министрлік тарапынан әкімшілікпен бірлесіп, кәсіпкерлермен және біздің әріптестермен жалғастырамыз», дейді Мәдениет және спорт министрі.
Шындығында, Шымбұлақтағы енді қайталанбайтын тарихи сәтке тау туризмін жақсы көретін қала тұрғындары да ортақтасты.
Қала тұрғындарының бірі Гүлмира Юсупова: «Талай елді шарлап көрдім. Бірақ біздің Шымбұлаққа жетері жоқ. Трасса керемет. Оны мұнда тұрақты түрде келетін шаңғышылардың бәрі жақсы біледі. Осындай мәртебеге ие болып жатқанына қуаныштымын», деді.
Ал Мәди Алдабергенов атты алматылық: «Мен 18 жылдан бері шаңғы тебемін. Кәсіпқой шаңғышымын. Шымбұлақ Гиннес рекордтар кітабына енуге әбден лайық. Расында, Шымбұлақ – шаңғы тебуге таптырмас жер. Гиннес рекордтар кітабына енгізілгеннен кейін келушілер саны көбейе түседі деген болжам бар», деді.
АЛМАТЫ
