Фото: instagram/bekzhan_turys
Жақында Алматыдағы өнер ордасы Мұхтар Әуезов атындағы Қазақ ұлттық драма театрының 98-маусымы ашылды. Театрдың ардагер актері жаңа қойылымның қызу дайындығына байланысты әлеуметтік желіден қол үзіп қалып, домбыраға байланысты жат ағымның жетегінде кеткендердің айтқанын енді ғана естігенін айтты.
«Қолынан домбыра тастамаған қазақтың бірі ретінде бұған бейжай қарай алмаймын. 70 жыл орыстың боданында отырғанда өз ұлтымның аузымен «қазақтың домбырасы - арам» дегенді ешкім айтқызбап еді. Ұмытпасам, «Терме» дейтін хабар да жүрді эфирде. Ал Тәуелсіздік алған соң бізге не көрінді, ағайын? Түсінгім-ақ келеді, бірақ… Діннің атын жамылып ұлттық құндылықтарымызға тиісу қайдан шықты? Қай кезде белең алды бұл?
Дінге жапқымыз келеді, анығында, ұлтының қастерлі мұрасынан безген һәм теріс ағымның жетегіне ерген «шіріген жұмыртқа» болғандардың түсінігі бұл. Әйтпесе кез келген халықтың дәстүрлі мәдениеті мен діни танымы өз ұлты үшін қасиетті саналатынын білмей ме бүкіл қазақ? Домбыра - қазақтың жаны, бабадан қалған бағзы мұра. Бірақ көне заманнан бері қазақтың жүрек қылын, даланың терең тарихы мен сан ғасырлық шежіресін шертіп келе жатқан ұлттық аспапты қазақтан айыру басталған сияқты», деп жазды Бекжан Тұрыс Facebook парақшасында.
Оның айтуынша, бұл шуды әлдекімдер әдейі ұйымдастырған болуы мүмкін. Бір мезгілде бірінен соң бірі бір сарында айтып жатқан сөздер оны осындай ойға жетелепті.
«Домбыраны «харам» деп жүрген жат ағымдағылардың әрекетіне тыйым салынуы керек, уақыты келді. Тұтас ұлт болып ұлттық аспабымыз - қасиетті домбырадан қазақты бездіргісі келетіндерге жауап ретінде қолынан домбырасы түспеген дәстүрлі әнші-күйшілерден бастап, бар қазақтың әлеуметтік желіде тек домбыра жайлы арнайы пост жариялап отыруын өтінем. Қағынан жерігендердің теріс насихатына, өзге ағымға кіріп дәстүр-салтымыз бен ұлттық мәдениетімізге қарсы шабуыл жасайтындарға арнайы заң қабылданып, белгілі бір шара қолданғанша бұл челлендж үзілмесе деймін. Әр қазақ арнайы пост жазбаса да, домбырамен айтылған ән немесе күйді парақшасына күнде жариялап отыруға тиіс. Ұсыныс-өтінішіме немқұрайды қарамайды деп сенем. Қазақты дәстүр-салтынан, ұлттық музыкасынан айырып, ұлт ретінде жойғысы келетін арампиғылдардың әрекетіне жол жоқ. Осыны түсінетін кез жетті. Сүрініп кетпе, қазақ баласы, сүрініп кетпе!» делінген жазбада.
