Көшпелілер салтында алыс жорыққа шыққан аттылардың асар аты, қосар аты деген болатыны тарихтан белгілі. Асар ат жолда азық қылуға арналса, ал қосар атты қосалқы ат деуге болады. Бүгінгі «Ұлы дала жорығы» марафонында бұл салттар да ескерусіз қалған жоқ. Тебінгісіне тер қатқан аттылар орта жолда тың атқа мініп, сапарын одан әрмен жалғастырды. Әзірге басып өткен жолдың ұзақтығы 850 шақырымнан асады. 14 қыркүйекте «Ұлы дала жорығы» марафон-бәйгесінің 9-кезеңі басталды. Елордадан аттанған 19 команданың 12-сі жолда, өзгесі жарыс жолынан шығып қалды.
«Енді командалар жолдан шығып қалады деген қауіп азайды. Өйткені шабандоздар ат ауыстырып мінді. Уақытын ұтымды пайдаланып, Түркістанға жетеді деген сенімдеміз. Былтыр 600 шақырымды 9 команда 32 атпен өтсе, биыл 650 шақырымды 12 команда 41 атпен алғашқы кезеңді аяқтап отыр. Былтыр 650 шақырымды бірінші болып бағындырған команданың уақыты шамамен 56 сағатты құраса, биыл 42 сағатта жүріп өтті. Бұл аттардың дайындығын көрсетеді. Екіншіден, бәсекенің өте жоғары деңгейде екенін білдіреді. Сондай-ақ 1-кезеңнің 4 аты командадан тыс 1 300 шақырымды бағындыруға бекініп отыр. Оның бәрі мал дәрігерінің рұқсатымен жүзеге асады», деді «Joryq» ат спорты федерациясының президенті, жоба авторы Бақытжан Тұрлыбек.
Бас төреші Надежда Купцованың айтуынша, командалардың жарыстан шығып қалуы олардың дайындығының аздығы мен аттардың бабы келіспегеннен болды.
«Ветеринарлардың кеңесіне құлақ түргендер жарысты әлі жалғастырып келеді. Әзірге Маңғыстау, Жетісу, Қостанай құрама командалары аттарына өте жақсы мән беруде. Былтыр жорыққа қатыса алмай қалған Қостанай облысы командасы бәрімізді тәнті етті. Мал дәрігерлерінің пікірінше, 650 шақырымды бағындырған аттар қатарында қостанайлық шабандоздар кәсібилігімен, тұлпарларының мықтылығымен қатты ерекшеленеді.
Дегенмен кімнің жеңіске жетуі мүмкін екенін айта алмаймын. Қалған жерді тың аттармен бастадық. Аттардың қалай бейімделетінін бақылауымыз керек. Әрі оңтүстік өңірге жақындаған сайын ауа райы жылы келеді», дейді Н.Купцова.
Ұйымдастырушылардың айтуынша, алда 5 кезең, яғни 450 шақырым қалды. Бұған әлі ат ауыстырмай келе жатқандар да бар.
«Астана қаласы, Маңғыстау, Жетісу, Қостанай облыстарының шабандоздары 650 шақырымды жүріп өткен тұлпарларымен Түркістанға дейінгі 1 300 шақырымды еңсеруді көздеп отыр. Бұл төрттікке төрешілер «Рекорд» деген атау беріп, арнайы 13-команда ретінде тіркеп, нәтижелерін күнделікті бақылап отыр. «Рекорд» командасының жігіттері діттеген мақсатына жетсе, келесі жылғы жорыққа Гиннестің рекордтар кітабының өкілдерін шақырту жоспарда бар. 1 300 шақырымды бір атпен аз уақытта бағындырған азаматтар мен қазанаттардың нәтижесі рекордтар кітабына бұрын-соңды болмаған ерекше нәтиже ретінде енгізуге сұранып тұр», дейді төрешілер.
Айта кетейік, «Ұлы дала жорығы» республикалық марафон-бәйгесінің бас серіктесі – «Sport Qory» туризм индустриясы мен спортты қолдау қоры.
