Коллажды жасаған – Қонысбай ШЕЖІМБАЙ, «EQ»
Кездесуде кредиторлық берешекті өтеу мәселесіне ерекше назар аударылды. Мұндағы берешек 800 млн теңгені құраған. Бұл сома пандемия салдарынан елде ауруханаға жоспарлы жатқызу тоқтатылған кезде жинақталыпты. Қазіргі таңда медициналық ұйым дебет пен кредит арасындағы тепе-теңдікті сақтап, келісімшарттар кестесіне сәйкес орындауды уақытылы жүргізіп жатыр. Кезеңдер де оң сальдомен жабылып отыр.
«Біз қызмет желісін сақтап келеміз. Бірақ осының өзіне көп күш-жігер жұмсалады. Наразылық та жоқ емес. Шындығына келсек, бізге жүгінетін науқастардың үштен бірін ғана емдеп отырмыз. Орта есеппен 30 мыңға жуық науқас келеді, олардың біразын амбулаторлық емге қабылдаймыз. Сонымен қатар ауруханаға шұғыл жатқызу үлесі жыл сайын төмендеп барады, қазір ол шамамен 65%-ға тең. Қиын науқастарды өзімізде қалдырып, дерті жеңіл науқастарды ауданға немесе амбулаториялық жатқызуға, кейбірін күндізгі стационарда емдету арқылы ауруханаға шұғыл жатқызу үлесін азайтудамыз», дейді Алматы көпсалалы клиникалық ауруханасының бас директоры Жұмағали Исмаилов.
Жыл басында ауруханада кредиторлық берешек қалыптасқанымен, бүгінде оның бәрі өтелген. Бас дәрігер шығынды оңтайландырудың тиімді бір жолы барын еске салды. Бұл – дәрілік заттар бойынша ревизия жүргізу.
«Аталған тізімде 600-ден аса дүние бар. Клиникалық фармакологты шақырып, апталап жұмыс істедік. Соның нәтижесінде тізімде 300 түрлі дәрі-дәрмек қана қалды. Мысалы, кейбір дәрілердің 12 түрлі аналогы сатып алынған. Қазір қажетсіз сатып алулар күрт төмендеді. Сондай-ақ баға саясатын да қайта қарадық. Енді медициналық ақпараттық жүйені «1С: Бухгалтерия» жүйесімен байланыстырсақ дейміз. Бұл дәрі-дәрмектерді автоматты түрде есептен шығару үшін керек», деді аурухана басшысы.
Инфрақұрылымның ескілігіне қарамастан, Алматы көпсалалы клиникалық ауруханасы кардиохирургия, ортопедия, ЛОР және кардиохирургия бойынша 27 жоғары технологиялық медициналық көмек түрін ұсынады. Ал кардиохирургия бойынша көмек облыста тек осында ғана көрсетіледі. Қазіргі уақытта жаңа ғимарат салынып жатыр. Көрсетілетін медициналық көмек түрлерін кеңейту жоспарланған.
Қор басшысы бұдан кейін Талғар ауданындағы Бесағаш және Тұздыбастау ауылдарының 14,8 мың тұрғынына қызмет көрсететін «Promedical» медициналық орталығына барды. Клиника биылдан бастап МӘМС бойынша жұмыс істейді. Орталық директоры Нұрлан Есмұратовтың айтуынша, мұнда 7 учаске құрылған, оның 2-уі – педиатриялық.
«Ауыл тұрғындары аудан орталығына немесе қалаға бармай-ақ емханада қажетті тексеруден өте алады. Салыстырмалы түрде алғашқы медициналық-санитарлық көмек көрсететін шағын мекемеде жалпы тәжірибе дәрігері мен негізгі мамандар ғана емес, сонымен қатар аллерголог, ревматолог, гепатолог, дерматовенеролог, андролог сынды облыс аумағынан табылуы қиын дәрігерлер бар. Клиника басшылығы пациенттеріне әртүрлі медициналық қызметтерге қолжетімділікті қамтамасыз ету арқылы жұмысты дұрыс ұйымдастырып отыр. Нәтижесінде, тіркелген халық саны да артып келеді», деді С.Ахметов.
Қарасай клиникалық көпсалалы орталық аудандық ауруханасы – стационар қызметін ұсынатын Қаскелеңдегі жалғыз аурухана. Сондықтан пациенттердің ағыны айтарлықтай жоғары. Тәулігіне 500-ге жуық адам келеді. Атап өтерлігі, олардың дені шұғыл жағдаймен жүгінеді. Бұл – барлық ауруханаға тән проблема. Егер емханалар диспансерлік пациенттерді тиісті түрде бақылап, оларды алаңдатарлық ахуалға жеткізбей амбулаториялық-емханалық бағытта емделсе, жағдай ішінара жақсарар еді. Осының салдарынан Қарасай клиникалық көпсалалы орталық аудандық ауруханасы шұғыл түрде түсушілерге тиісті көмек көрсету үшін ауруханаға жоспарлы жатқызуды тоқтатуға мәжбүр.
Қонаев қаласының қалалық көпбейінді ауруханасында урологиялық және ЛОР-бейінді төсектері бар хирургия бөлімшесі, жақ-бет хирургиясы төсектері бар травматология және нейрохирургия бөлімшесі, гинекология және перзентхана бөлімшесі, пульмонология төсектері бар неврология терапиясы бөлімшесі, реанимация бөлімшесі, балалар соматикалық бөлімшесі және облыстағы жалғыз инфекциялық бөлімше бар. Мұнда аймақтағы өзге ауруханалар сияқты қаржыландырудың шектеулі болуына байланысты стационарлардың толық жүктемесі жоқ. Бірақ қажеттілік жоғары. Өйткені мұның облыс орталығындағы жалғыз аурухана екенін ескеру керек.
Аурухананы 2017 жылдан бері басқарып келе жатқан бас дәрігер Айман Рақышева 2023 жылдың ерекше қиын болғанын айтты. Осы уақытқа дейін мұнда ешқашан кредиторлық берешекке жол берілмеген. Алайда медициналық қызметкерлердің жалақысын көтеру міндеттемелерін орындау қажеттілігіне байланысты жалақы қоры бойынша шығындар 82%-ға дейін өскен. Сондай-ақ «СҚ-Фармациямен» есеп айырысуда мәселе бары тілге тиек болды.
Медициналық ұйымдарды аралаған Сәбит Ахметов учаскелік дәрігерлермен де әңгімелесті. Ол халықтың медициналық сақтандыру мен қамту аясында жүргізіліп жатқан жұмыстарға сәйкес адамдардың МӘМС жарналарын төлеу қажеттілігіне қалай қарайтынына қызығушылық танытты.
«Бұрын қиын болатын. Қазір адамдар МӘМС арқылы тегін тексеруден өтуге болатынын біледі, әсіресе операция қажет кезде. Біз сақтандырылғандар саны бойынша оң динамиканы байқап отырмыз. Алайда бұл іске дәрігерлер ғана емес, әкімдік, жұмыспен қамту орталығы және салықтық органның да қатысуы қажет екенін жеткізгім келеді», деді жалпы тәжірибе дәрігерлері.
Алматы облысы
