Инфографиканы жасаған – Амангелді Қияс, «ЕQ»
Кездесуде еліміздің теміржол саласын жаңғырту аясында Wabtec компаниясымен арадағы ынтымақтастықтың келешегі талқыланды. Сондай-ақ Президенттің АҚШ-қа сапары аясында «Қазақстан темір жолы» «ҰК» акционерлік қоғамы мен Wabtec арасында стратегиялық ынтымақтастық туралы негіздемелік келісімге қол қойылды.
Бұдан бөлек, Президент Қ.Тоқаев «Citigroup» компаниясының бас атқарушы директоры Джейн Фрейзермен келіссөз жүргізді. Кездесу барысында америкалық Қаржы холдингінің еліміздегі қызмет аясын кеңейту мүмкіндігі талқыланды.
Жиыннан кейін «Астана» халықаралық Қаржы орталығының басқарушысы Ренат Бектұров Мемлекет басшысының Wabtec және Citigroup компанияларының жетекшілерімен өткізген кездесуінің нәтижелері жөнінде пікір білдірді.
«Бүгін Нью-Йорк қаласында екі кездесу өткіздік. Оның бірі – Wabtec компаниясы. Екіншісі – Citibank. Wabtec компаниясы негізі елімізде жиырма жылдан бері жұмыс істеп келеді. Қазір Астанада мыңға жуық адамды жұмыспен қамтып отыр. Бұл – америкалық локомотив өндіретін кәсіпорын. Бүгінгі жаңа келісімшарт жаңа кезеңнің басталуы. Яғни Citibank-тің қаржыландыруы арқылы Wabtec компаниясы елімізде 240 жаңа локомотив құрастырмақ», деді Р.Бектұров.
Оның айтуынша, мұндай келісім Мемлекет басшысы Қ.Тоқаевтың орта дәлізді дамыту жөніндегі тапсырмасын ілгерілетуге септігін тигізеді. Бұл мәміленің құны 900 миллион долларға тең. Президент «Әділетті мемлекет. Біртұтас ұлт. Берекелі қоғам» Жолдауында еліміздің қазіргі геосаяси жағдайда Азия-Еуропа арасындағы аса маңызды құрлық дәлізі болып отырғанын айта келіп: «Біз бұл мүмкіндікті толық пайдаланып, әлемдік маңызы бар көлік-тасымал торабына айналуымыз керек», деген еді.
Wabtec компаниясы «Қазақстан темір жолы» компаниясының локомотив базасының 15 пайызға жуығын жаңартуға мүмкіндік беріп отыр. Citibank корпорациясы 900 миллион несие береді. Ол америкалық Эксимбанк гарантиясымен бекітілген. Сондықтан бұл мәселе АҚШ Конгресінде қаралмақ. Бұл еліміздің шетелдік инвестицияларға, соның ішінде америкалық инвестицияға ашық әрі қызық екенін көрсетеді», деді Р.Бектұров.
Естеріңізге сала кетейік, Fortune 500-дің тізіміне енетін Wabtec (Westinghouse Air Brake Technologies Corporation) компаниясы көлік және логистика саласындағы әлемдік көшбасшылардың бірі саналады. Қазіргі таңда компанияда 50-ден астам елден 27 мыңнан астам қызметкер жұмыс істейді.
