Парламент осымен екінші рет популистік партияның басшысы А.Фейхооның кандидатурасын қабылдамады. Бұған дейін сәрсенбі күні дауыс беру рәсімі өткен. Жаңа премьер-министрді тағайындау үшін 350 депутаттың 176-сы қолдап дауыс беруі қажет. Алайда оған 178 депутат қарсы шықты. Осылайша, алғашқы раундта А.Фейхоо діттеген мақсатына жете алған жоқ.
Жұма күні тағы бір мәрте сайлау өткен. Бұл жолы да парламент мүшелері пікірінен айныған жоқ. Үміткерге небәрі 172 саясаткер қолдау білдірсе, 177-сі қарсы шыққан. Қалған бір дауысты каталониялық депутат қателесіп берген екен. Сондықтан бірден одан бас тартып, нәтижесінде оның пікірі есепке алынған жоқ.
А.Фейхооның премьер-министр болу өтінішін парламент түбегейлі қабылдамағаны белгілі. Сондықтан Испания королі VI Филипп енді саяси көшбасшыларды Зарсуэла сарайына шақырып, премьер-министрді тағайындау мәселесін күн тәртібіне қояды. Сарапшылардың пайымдауынша, қазіргі таңда басты үміткер премьер-министр міндетін атқарушы және Социалистік партияның жетекшісі Педро Санчес екені анық. Өйткені ол басты бәсекелесі асыққан кезде әліптің артын бақты. Енді іске кірісетін сәт келіп тұр.
Педро Санчес үкімет басшысы қызметіне қайта тағайындалу үшін парламентте көпшіліктің қолдауын иеленуі қажет. Демек, ол Карлес Пучдемон партиясының қолдауына сүйенеді. Өздеріңізге мәлім, Каталонияның бұрынғы президенті К.Пучдемон 2017 жылғы егемендік алу жөніндегі референдумнен кейін қудалауға ұшыраған еді. Сарапшылардың пайымдауынша, Социалистік партияның көшбасшы П.Санчес Каталонияның 2017 жылғы тәуелсіздік жөніндегі референдумнан кейін қудалауға ұшыраған саясаткерлерге рақымшылық жасауды уәде етуі мүмкін.
Естеріңізге сала кетсек, Каталония тәуелсіздікке бірнеше рет талпыныс жасаған. Мәселен, 2014 жылы аймақта тәуелсіздік алу жөнінде халықтық референдум өтті. Онда электораттың басым бөлігі Испаниядан бөлінуге дауыс берді. «Жеті рет өлшеп, бір рет кесуді» жөн көрді ме, бір жылдан кейін тағы бір мәрте референдум ұйымдастырылып, қатысушылардың көбі егемендікті жариялауға келісімін берді. Мәселе 2017 жылы ушықты. Өңірде жалпы халықтық референдум өтіп, дауыс бергендердің 90 пайызы азаттық алуды қолдады. Референдумға 5,3 млн электораттың 42,3 пайызы қатысып, 2,26 млн каталониялық тәуелсіздікті жақтап шықты. Сол кездегі Каталония президенті Карлес Пучдемон елдің егемендігін жариялаған. Бірақ Испания бұл шешімге қарсы келіп, референдум ұйымдастырғандарды қудалады. Кейін референдум ұйымдастырушылардың біразы ұсталып, қылмыстық жауапкершілікке тартылды. Енді Социалистік партия соларға рақымшылық жасау арқылы каталондардың көңілін табуға тырысады.
Дегенмен мәселе мұнымен біте қалады дегенге сену қиын. Каталониялық басқа партиялар П.Санчестің сөзіне күмәнмен қарайды. Сондықтан Социалистік партия басшысының нақты уәде бергенін талап етіп отыр. Алда-жалда тараптар келісе алмаса, сөйтіп алдағы отырыстарда П.Санчестің кандидатурасын депутаттар көпшілік дауыспен мақұлдамаса, онда парламент таратылады. Сөйтіп, келесі сайлау 2024 жылғы 14 қаңтарда өтеді.
Биыл шілдеде Испанияда жалпы парламент сайлауы өтті. Онда халық Конгресс пен Сенат депутаттарын сайлады. Айта кетерлігі, Пиреней түбегіндегі елде Сенатқа қарағанда Конгрестің құзыреті кең. Олар премьер-министрді тағайындайды, Сенат мақұлдамаған заңды көпшілік дауыспен қабылдауға құқылы. Сол себепті төменгі палатаның сайлауы әрдайым бәсекеге толы.
Бұл жолы да саяси дода тартысты болды. Күтпеген жерден Альберто Нуньеса Фейхоо бастаған «Халық партиясы» жеңіске жетіп, жалпы 137 мандат иеленді. Испания социалист жұмысшылар партиясы 31,68 пайыз қолдау иеленіп, 121 депутатын ғана Конгреске өткізе алды.
